DILI, STLTIMORLESTE.com – Polísia Nasionál Timor Leste (PNTL) liu husi Diresaun Tranzitu Seguransa Rodaviariu Nasional (DTSRN) hahu husi fulan Marsu rejistu kazu asidente hamutuk 191 no ema lakon vida iha nain 4.
Diretor Diresaun Tranzitu Seguransa Rodaviariu (DTSRN), Superintendente Asistente Polísia, Luis da Costa dehan, PNTL liu husi DTSRN neebe eziste iha munisípiu 13 inklui Rejiaun Administrativa Espesial Oekusi-Ambeno (RAEOA) rekolha asidente iha fulan Marsu total kazu hamutuk 191.
“Husi kazu asidente nee hamutuk 191 nee ema lakon vida nain 4, ema kanek todan hamutuk nain 32, kanek kmaan hamutuk nain 191,” hatete Superintendente Asistente Polísia, Luis ba jornalista sira.iha Komando Jeral PNTL, Dili, Kinta (10/04/2025).
Nia tenik, husi kazu nee polísia konsege finaliza kazu ida no sei prosesu iha nia laran mak kazu 4, neebe rezolve anivel infratores iha terenu hamutuk 94.
Nia esplika, kazu neebe akontese ho fator determinasaun mak fator humanu 90%, fator veikulu hamutuk 5% no mos fatór estrada hamutuk 5%.
Nia koalia, akontese asidente fatal neebe iha Munisípiu Díli nain 2, iha Munisípiu Likisa nain 1 no mos iha Munisípiu Manufahi nain 1, iha asidente nee fator umanu 90%.
Iha fatin ketak, Akademista UNTL, Paulino da Costa informa, kazu asidente sempre akontese iha Munisipiu Dili, tanba foin daudaun iha asidente fatal ida neebe akontese iha Funan buaras oin no lakon sidadaun feto ida nia vida.
“Asidente neebe akontese iha sidade Dili barak liu, tanba nee ita husu ba Polisia Tranzitu tenke loron-loron hamriik iha publiku hodi orienta kareta no motor lao tuir regras no halai ho kuidadu,” nia afirma.
(jen)
