DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodaviariu (DTSRN) rejistu dadus kazu asidente ho tipu oin-oin hahu husi fulan Janeiru too Setembru hamutuk 1.674, iha Munisipiu sira inklui iha kapital Dili.
“Tuir dadus data estatistika tranzitu liga ho asidente akontese hahu fulan Janeiru too Setembru neebe ita kobre munisipiu sira hotu hamutuk 1.674,” hatete Diretór Diresaun Tranzitu Seguransa Rodaviariu, Superintendente Xefe Polisia, Antoninho Mauluta ba jornalista sira iha nia knaar fatin Komando Jeral PNTL, Kinta nee (23/10/2025).
Nia dehan, husi kazu asidente nee bele konta kazu ida, maibe vitima nee barak pur ezemplu bis bakufila konta kazu ida, maibe vitima barak.
“Husi kazu hirak nee, ita koloka ba iha sira neebe mak kanek kmaan 1.953, kanek todan 200 no mate 72 vitima,” nia tenik.
Nia esplika, husi kazu sira nee hotu, halo prosesu final hamutuk 21 no prosesu sei iha tribunál iha 62 no sei iha prosesu nia laran hamutuk 848 inklui sira neebe mak konsege rezolve de’it iha 743.
“Ida nee mak durante nee ita nia polisia tranzitu sira halo liu-liu ba investigador, bainhira iha kazu asidente ruma sira sempre atende hotu,” katak nia.
Nia haktuir, husi kazu asidente hirak nee, tranzitu mos klasifika fator sira neebe fo impaktu ba hetan asidente mak fator ema aas liu hamutuk 90%, fator veikulu 5% no fator estrada iha 5% no laiha fator natureza.
“Ida nee mak relatoriu sira mai husi ita nia munisipiu sira, ida nee hahu husi fulan Janeiru too Setembru nian,” nia esplika.
Nia deklara, atu reduz kazu Asidente ne’ebe kauza barak liu husi fator ema 90% nee mak primeiru husi DNTT tenke halo sosializasaun ligadu ho lei tranzitu nian no tun direita ba iha eskola sira.
“Tanba parte tranzitu nota katak, asidente barak mak mai husi estudante sira .Ita persiza tun ba iha eskola sira hahu husi eskola pre-sekundaria no sekundaria oinsa sira displina uza transporte tama ba iha estrada publiku tenke komprende sinais tranzitu no hala’i velosidade reduz”, nia hatutan.
Entretantu, Diresaun Tranzitu Seguransa Rodaviariu mos rejistu relatoriu dadus komete infrasaun no aplika koima hamutuk osamentu US$ 19.444 iha Munisipiu Dili nian deit iha tranzitu Kuartel jeral PNTL ninia atuasaun.
Maibe iha munisipiu sira hotu-hotu neebe parte tranzitu aplika koima ba veikulus sira komete infrasaun hamutuk rihun US$ 67 resin.
“Kona-ba infrasaun hahú husi Janeiru to’o Setembru nian ne’ebe kobre ba munisipiu hotu-hotu ninian infrasaun nee haree ba koima hamutuk US$ 67.356”, nia deklara.
Aleinde nee tranzitu mos rekolha koima komete infrasaun nian mai husi fronteira sira postu integradu fronteira haat (4) hanesan Batugade, Suia, Oekusi no Salele hamutuk US$ 160.420.
“Ida nee mak tranzitu sira nia relatoriu ne’ebe mak halo rekapitulusaun husi relatoriu mai husi munsipiu hotu-hotu inklui ita nia fronteira sira”, nia koalia.
Iha fatin ketak, Motorista Julia do Carmo hatete, Polísia Tranzitu tenke servisu makaas hodi halao cek point nafatin ba motor no kareta sira neebe kontinua kontra Sinais Tranzitu.
“Ita haree sidade Dili motor no kareta barak demais, tanba ita nia Tranzitu tenke servisu mak hodi kontrola, tanba ita haree dala barak ema kontra barak liu,” nia afirma.
Jornalista: Jeniche da Costa
Editor: Xisto Mendonça
