DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodoviária Nasional (DTSRN) rejistu kazu asidente hamutuk 179 no ema neebe lakon vida hamutuk nain 7.
Diretor DTSRN, Superintendente Asistente, Luis da Costa dehan, DTSRN neebe eziste iha 14 Munisipiu neebe fulan Fevereiru hahu husi loron 1 too 28 Fevereiru, Polisia Tranzitu halao nia atividade Seguransa Rodaviariu konsege rejista kazu asidente 179.
“Husi numeru neebe hau mensiona iha ema neebe lakon vida nee nain 7, ema mak mate, kanek kmaan nain 235, kanek todan 37,” hatete Diretor Diresaun Tranzitu Seguransa Rodoviária Nasional (DTSRN), Superintendente Assistente, Luis da Costa ba jornalista sira iha Komando Jeral PNTL Kaikoli, Dili, Segunda (17/03/2025).
Nia esplika, husi kazu hirak nee ita halo prosesu ba Ministeriu Publiku (MP) ba Tribunal nee iha nia finalidade hetan ida, nomos prosesu agora iha Tribunal hamutuk haat, sei iha prosesu nia laran nee 73, rezolve familia iha nivel infratores sira hamutuk 76.
“Ita haree fator neebe dominante husi komportamentu ba iha asidente nee mak fator humanu nia presentajen mak maioria,” nia deklara.
Iha fatin ketak, Kondutór Abilio Deus informa, daudaun nee asidente iha dalan barak liu, balu lori motor ho kondisaun lanu no balu hakarak halai velosidade makaas no too lalais, tanba nee husu ba Polisia Tranzitu tenke halo pasa revista loron-loron atu nunee bele identifika kondutór neebe kondisaun dukur no lanu labele lori kareta ou motor.
“Ita haree kareta balu asidente, tanba kondutór kondisaun dukur no iha balu lori motor lanu, tanba nee sempre akontese asidente iha fatin-fatin, ” nia afirma.
(jen)
