DILI, STLTIMORLESTE.com – Hahu fulan Janeiru too Junhu tinan 2025, Komando Polisia Nasionál Timor Leste (PNTL) liu husi Diresaun Tranzitu Seguransa Rodaviaria Nasional (DTSRN) rekolha reseita ba kofre estadu hamutuk US$ 396.842.409.
Nia dehan, reseita sira nee mai husi atividade Tranzitu Seguransa Rodaviaria Komando Nasional nian neebe halo ba pasa revista swiping no mos patrulhamentu ba karreta no motor, hahu husi fulan Janeiru too Junhu neebe konsege hatama reseitas ba iha kofre Estadu hamutuk US$ 396.731.
Nia tenik, Diresaun Tranzitu Seguransa Rodavizaria Nasional mos koilheta reseita husi pontu entrada haat mak hanesan Batugade (Bobonaro) Mota-Masin (Kovalima) Sakatato no Oesilo (Oecusse) hamutuk US$ 111.409.
“Total husi taxa no reseita neebe mak tama ba iha kaixa Estadu husi atividade pasa revista no pontu entrada nee tau hamutuk mak ho montante US$ 396.842.409,” hatete Diretor Diresaun Tranzitu Seguransa Rodaviaria Nasionál (DTSRN), Superintendente Assistenste Polísia Luis da Costa ba jornalista sira iha nia knaar fatin Komando Jeral PNTL, Kuarta (09/07/2025).
Nia esplika, durante nee husi DTSRN aleinde halo atividade pasa revista ba motorizada sira iha pontu entrada haat hanesan Batugade, Mota-Masin, Sakato no Oesilo mos aplika taxa signifika kuandu kareta sira husi nasaun vizinhu tama teritoriu nasionál tenke selu taxa, tanba nee mak husi Diresaun Nasional Tranzitu Seguransa Rodaviariu mos koilheta taxa ba iha pontu entrada haat nee.
Iha fatin ketak, Akademista UNTL, Adérito da Silva informa, Servisu Diresaun Tranzitu Seguransa Rodaviariu Nasional (DTSRN) servisu makaas tebes, tanba sira bele rekolha reseita ba kofre estadu hamutuk US$ 396.842.409.
“Ita haree osan neebe ita nia PNTL rekolha nee laos osan kiik, ita haree fulan Janeiru too Junhu nee sira hatama US$ 396.842.409 ba ita nia estadu nee osan boot, no parabens ba Polísia Tranzitu tanba sira servisu makaas halo cek point no ba komunidade jerál nomos ba Funsionáriu sira, liu-liu ba membru PNTL sira mos foin daudaun ita haree sira tilan membru polisia nian motor barak no ba selu iha banku,” nia afirma.
(jen)
