DILI, STLTIMORLESTE.com – Polisia Nasional Timor Leste (PNTL) liu husi Diresaun Tranzitu Seguransa Rodoviariu Nasionál (DTSRN) halao cek poin no halo patrulhamentu rekolha reseitas ba kofre estadu hamutuk US$ 41.103.
“Ita mos halao cek poin no halo patrulhamentu ita konsege hatama reseita ba kofre estadu US$ 41.103. Munisípiu Dili hetan primeiru lugar, Munisípiu Ermera segundu lugar, Munisípiu Baukau Terseiru no kuartu mak Tranzitu Rodoviariu,” “hatete Diretór Nasionál Tranzitu Seguransa Rodoviariu Nasionál, Superintendente Asistente Luís da Costa ba jornalista sira iha Komando Jeral PNTL Kaikoli, Dili, Segunda nee (16/06/2025).
Nia esplika, reseita nee mos kobre husi Unidade Polísia Fronteira (UPF), iha Mota masin, Batugade, Sakato no Oesilo mai husi Transporte Terrestre rekolha hamutuk US$ 1.330, transporte neebe tama iha fronteira husi transporte pasadu mak 679 no transporte lijeiru mak 651, husi transporte sira nee konsege hatama ba kofre estadu US$ 20.196.
“Husi infrsaun, reseita no taxa nee total hamutuk US$ 61.299, ida nee mak dadus neebee hakarak atualiza ba públiku,” nia informa.
Iha fatin ketak, Akademista Universidade Nasional Timor Lorosae (UNTL), Adérito da Silva deklara, Polísia Tranzitu iha sidade Dili daudaun nee halao servisu kona-ba cek poin no patrulhamentu hodi rekolha reseita ba kofre estadu nee makaas.
“Ita haree Polisia Tranzitu nia servisu makaas, tanba sira sempre halo atividade cek point no liu husi sira nia servisu makaas sira hatama reseita neebe ho montante neebe boot ba ita nia estadu, hau hanoin labele akontese deit iha Sidade Dili, maibe iha mos Munisípiu sira, tanba iha Munisípiu sira komunidade la uza kapasete ba mai iha Polísia nia oin mos sira haree deit,” nia afirma.
(jen)
