DILI, STLTIMORLESTE.com – Tribunal Judisial Primera Instansia Dili halao julgamentu ba arguidu ho inisial SV hanesan laen, tanba komete krime hasoru lezada ho inisial JC hanesan feen.
Tuir akuzasaun neebe Juiz prosesu Ivan Suritai lee sai iha loron Segunda (11/11/2024) katak, arguidu no lezada hanesan feen no laen, maibe sira seidauk iha oan ida.
Iha loron 1 fulan Agostu 2023, tuku 4 kalan, iha Manleu, momentu neeba arguidu hirus lezada hodi dudu lezada monu ba rai, rezulta lezada nia ain kiik kanek, no mos ain tur kanek.
Motivu husi problema nee, tanba deit arguidu hirus lezada nia alin sira neebe hela ho sira hamutuk, maibe halimar deit telefone la prepara hahan. Ho ida nee mak lezada la simu, hodi diskuti malu ho arguidu, ikus mai arguidu hirus hodi dudu lezada.
Konsekuensia husi arguidu nia hahalok nee rezulta lezada hetan kanek. Tanba nee Ministeriu Publiku akuza arguidu komete krime Violensia Domestika ho Forma Ofensa Integridade Fizika Simples, neebe previstu iha artigu 145 husi Kodigu Penal.
Hatan ba akuzasaun neebe iha, arguidu konfesa ba faktus katak, momentu neeba arguidu halo duni agresaun ba lezada.
Arguidu deklara, primeiru arguidu hirus uluk lezada nia alin nain rua neebe hela ho sira, tanba kalan la prepara hahan, maibe kaer deit telefone iha liman. No ida nee mak halo lezada hirus arguidu atu labele hirus lezada nia alin sira, ikus mai mosu diskusaun entre arguidu no lezada hodi arguidu nervozu dudu lezada.
Arguidu deklara, akontese tiha problema nee arguidu sai tiha husi uma durante fulan ida, depois mak lezada kontaktu fali arguidu hodi hateten katak, lezada moras todan. Rona ida nee arguidu mos desidi fila fali ba sira nia uma, no hahu husi problema nee too mai agora, sira diak malu ona la iha tan problema.
Arguidu deklara tan, problema neebe akontese foin primera vez, maske arguidu no lezada durante tinan 15 ona sira la iha oan, maibe nunka akontese problema boot. No arguidu ho lezada nia servisu mak fo osan ba ema empresta, no sira nain rua mak responsavel hotu ba lezada nia alin rua neebe eskola, no mos arguidu nia alin ida tanba hela hamutuk ho sira.
Tribunal haree katak, arguidu konfesa ba faktus, tanba nee Tribunal deside hodi tama ba iha alegasaun.
Iha alegasaun nee Prokurador Napoliao da Silva husu ba iha Tribunal atu kondena arguidu ho pena multa US$ 45. Enkuantu Defeza Jose Maria Guterres husu ba iha Tribunal atu aplika pena multa, maibe menus husi valor neebe mak Prokurador husu.
Rona tiha alegasaun, Tribunal adia ba loron seluk hodi rona desizaun.
(ter)
