DILI, STLTIMORLESTE.com – Durante loron matebian hahu loron 1 too 3 Novembru 2024 iha asidente Trafiku, neebe rejistu iha sala Emerjensia Hospital Nasional Guido Valadares (HNGV) 26 resin.
“Iha nee ami sei relata ba ita boot sira kona-ba dadus moras neebe mak rejistu iha sala emerjensia, durante loron boot hahu husi loron 31 Outubru too loron 3 fulan Novembru pasiente neebe mak tama iha sala emerjensia hamutuk nain 452, husi numeru nee kazu asidente hamutuk nain 26 resin no kazu krime tiru ida,” hatete Xefe Departementu Emerjensia Hospital Nasional Guido Valadares ( HNGV), Julia Rodriques Quintao ba STL iha sala Emerjensia HNGV, kuarta (06/11/2024).
Nia esplika, husi numeru asidente trafiku nain 26 resin neebe mak rejistu iha sala Unidade Emerjensia nee, asidente trafiku motorizada hamutuk 25 no asidente trafiku karreta 1, feto hamutuk nain 11 no mane hamutuk nain 15.
Iha fatin hanesan, Familia Pasiente Luciano do Carmo esplika, pasiente barak mak baixa iha sala Emerjensia, too balu toba iha koridor leten, tanba fatin espasu la diak.
“Ita haree pasiente tama iha sala Emerjensia HNGV barak tebes, tanba nee ita tenke hein too hetan tratamentu, tanba espasu iha Emerjensia la diak, ita haree pasiente balun toba iha koridor leten,” nia informa.
(jen)
