DILI, STLTIMORLESTE.com – Durante loron paskua neebe sarani sira selebra, Polísia Nasionál Timor Leste (PNTL) liu husi Tranzitu Seguransa Rodaviariu Munisipiu Dili prende motorizada hamutuk 119 neebe la kompri regras tranzitu nian.
“Iha motorizada hamutuk 119 neebe Komando PNTL Dili halo apreensaun, tanba hirak neebe lori motorizada balun la kumpri ba regras Trazitu, liu-liu balun ita haree kapasete laiha, balun asesores motorizada laiha,” hatete Komandante PNTL Munisípiu Dili, Superintendente Xefe Polísia, Orlando Gomes ba jornalista sira iha Eskuadra Dom Aleixo, Dili, Kuarta nee (23/04/2025).
Nia esplika, motorizada sira nee agora daudaun asegura ona iha Komando Munisípiu Dili para kontinuasaun ba iha prosesu.
“Depois ita mos halo operasaun paskua prende motor kanu resin hamutuk 10 neebe mak ita asegura hela iha Komando Munisipiu Dili, para ita halo kontinua prosesu,” nia informa.
Iha fatin hanesan, Motorista Domingos Filipe dos Santos deklara, motor Polisia Tranzitu foti iha Mandarin nian, too agora seidauk bele foti, tanba motor uza kanu resin.
“Hau nia motor CRF ida foin daudaun loron paskua nee Polísia Tránzitu foti, tanba uza kanu resin, too agora seidauk bele foti tanba seidauk selu iha Banku, depois montante osan hamutuk US$120, tanba nee osan iha mak foin bele hasai,” nia afirma.
(jen)
