BOBONARO, STLTIMORLESTE.com – Visi Koordenador Orfonatu Madre husi Kongregasaun SSPS iha Aldeia Oplegul, Suku Holsa, Postu Administrativu Maliana, Munisipiu Bobonaro, Madre Casilda Pinto, SSPS konfesa katak, durante nee sira hetan deit apoiu ai-haan no ropa husi Prezidente Republika (PR), Jose Ramos Horta ho Primeiru Ministru (PM), Kay Rala Xanana Gusmão deit, husi Ministeriu Solidariedade Sosial no Inkluzaun (MSSI) ate ohin loron proposta lubuk ida mak haruka ba hodi hetan apoiu, maibe ate too ohin loron seidauk iha.
Madre Casilda Pinto,SSPS hatoo kestaun nee ba STL iha orfonatu kongregasaun SSPS Aldeia Oplegul, Suku Holsa, Postu Administrativu Maliana, bainhira simu ekipa apoiu Sosiedade Civil Presidensia da Republika neebe maka lidera husi Xefe Departementu Inventarizasaun Presidensia Republika, Simeão Goncalves Correia ho ekipa entrega Parsela Natal husi Presidente da Republika, Jose Ramos Horta ba Orfonatu sira iha Munisipiu Bobonaro, Sabadu (08/11/2025).
“Ami hatoo agradese no obrigado wain ba Nai Prezidente da Republika Jose Ramos Horta neebe sempre hanoin ami iha fatin ida nee. Ami kuaze tinan 6 ona, nunka falta apoiu husi Avo Prezidente da Republika, iha tempu bailoron mos, kuandu PR Mai Maliana, sempre lori apoiu aihan no ropa hanesan nee, Avo sempre la haluha kiik oan sira neebe maka hela iha Orfonatu Maliana. Durante tinan naruk nia laran, kiik oan sira nee moris husi Avo Ramos nomos Avo Xanana, tanba ami mos la iha buat ruma atu fo han no fo hatais ba kiik oan sira nee, so Avo nain rua nee maka sempre fo ajuda aihan no ropa, tanba nee agradese ba Avo Horta ho ekipa Sosiedade Sivil Presidensia Republika neebe lori ona aihan no ropa mai ami nia kiik oan sira iha edifisiu madre SSPS Maliana. Ami reja nafatin ba Avo no ita hotu neebe ohin sakrifisiu lori aihan no ropa sira nee mai too ami nia fatin atu saude diak nafatin.
Nia dehan, sira hatama ona proposta lubuk ida ba MSSI hodi apoiu aihan nesesidade baziku ba kiik oan sira nia nesesidade, maibe ate ohin loron seidauk hetan resposta, maibe agradese ba Xefe Estadu no Xefe Guvernu, avo nain rua nee maka sempre lori aihan no ropa mai orfonato Maliana.
Iha oportunidade hanesan, Xefe Departementu Inventarizasaun Presidensia Republika, Simeão Goncalves Correia dehan, ohin nia ho Ekipa Apoiu Sosiedade Sivil Prezidente Republika, Jose Ramos Horta, lori apoiu nesesidade baziku no mantal ba madre sira husi kongregasaun SSPS neebe maka durante nee tau matan ba labarik oan kiak sira iha Maliana, hodi utiliza iha festa natal tinan 2025.
“Ohin ami hakat mai iha Orfonatu Maliana hodi entrega nesesidade bazika no mantal husi Prezidente da Republika, Jose Ramos Horta neebe sempre iha domin ba alin kiik oan sira neebe maka durante nee hamahan aan iha Orfonatu Aldeia Oplegul, tau matan husi Madre Kongregasaun SSPS Maliana nomos fatin seluk. Hau lori Prezidente da Republika nia naran hatoo komprimentus no Ksolok Natal tinan 2025 ba Madre no oan sira hotu, Avo PR Horta sempre iha domin ba kiik oan sira, tanba nee maka ohin lori Parsela Natal husi Prezidente da Republika too orfonatu Maliana,” dehan nia.
Entrega Parsela Natal ba Missionarie of the Pool Saburai
Hafoin ida nee, Ekipa Sosiedade Civil kontinua viajen husi Suku Holsa ba Suku Saburai entrega parsela Natal ba labarik sira neebe hamahan aan iha sentru formasaun oan kiak sira iha Missionarie of the Pool iha foho hun Saburai.
Suku Saburai neebe lokaliza iha Postu Administrativu Maliana Munisipiu Bobonaro, area neebe izoladu tebes iha foho hun Saburai, amu lulik sira husi Missionarie of the Pool ka sentru formasaun ba ema kiak sira, eskolhia fatin nee hodi hakbesik liu tan ba povu iha area rurais hodi tulun sira liu husi formasaun nomos tulun Timor oan sira pratika serbisu loron-loron baa an rasik hodi kore aan husi terus no susar ho kreatividade nakfilak rai ho produtu oi-oin, sai produtu neebe iha valor ekonomia hodi kore moris husi terus ba moris diak.
Iha okaziaun nee, Xefe Departementu Inventarizasaun Presidensia Republika, Simeão Goncalves Correia lori prezidente da Republika dehan, ohin hakat mai iha sentru formasaun ba ema kiak sira neebe tau matan husi amu lulik sira iha Missionarie of the Pool Saburai, hodi entega parsela natal, domin husi Prezidente da Republika Jose Ramos Horta ba kiik oan sira neebe maka hamahan aan iha Missionarie of the Pool Saburai.
Xefe Departementu Inventarizasaun Presidensia Republika, Simeão Goncalves Correia dehan, ohin entrega parsela natal ba maluk sira iha sentru formasaun bae ma kiak sira neebe hamahan aan iha Missionarie of the Pool Saburai hanesan aihan nesesidade baziku nomos mantal nee oferese husi Prezidente da Repubika, Jose Ramos Horta nia doadores no amigo diak ida husi Hongkong ba maluk Timor oan sira.
“Mantal nee fahe lubuk ida ona ba povu Timor laran tomak, inklui maluk sira neebe hamahan aan iha Missionarie of the Pool Saburai. Sasan hirak nee, ita nia Prezidente da Republika, Jose Ramos Horta hakarak oferese ba maluk sira iha baze, liu-liu ba madre sira neebe mak hakiak labarik kiik oan sira inklui Missionarie of the Pool Saburai, hanesan domin husi Xefe Estadu ba ema kiak sira, atividades nee asaun karitativa no tama ona ba loron boot Natal, entaun sasan sira nee hanesan parsela natal maske ho kuantidade kiik maibe domin boot husi Nai Prezidente da Republika ba kiik oan sira neebe maka hamahan aan iha Missionarie of the Pool, nunee Amo sira bele hatutan ba sira neebe presiza,” dehan nia.
Iha biban nee, Bruder Francisco Xavier Tiker, hatoo agradese wain ba domin husi Prezidente da Republika, Jose Ramos Horta ba sentru formasaun ba ema kiak sira iha Missionarie of the Pool Saburai Postu Administrativu Maliana Munisipiu Bobonaro.
“Ami husi Familia boot Missionarie of the Pool, hatoo obrigado wain ba Prezidente da Republika neebe ho domin no fuan neebe boot, kiik oan sira nomos komunidade neebe maka hela iha area saburai. Ami husi Missionarie of the Pool agradese ba ita boot sira, ho forsa no hanoin, atu oinsa lori ita nia sosiedade nee ba oin, tanba iha nee ema barak hamrok, hamlaha maibe ita boot sira mai haforsa ho Prezidente da Republika nia fuan no domin boot, ita boot sira konsege mai too iha nee hodi entrega aihan no ropa ba ami iha nee, Viva Timor Leste ba domin boot ida nee,” dehan nia.
Jornalista: Joseph Koa
Editor: Joseph Koa
