DILI, STLTIMORLESTE.com – Estudante ho naran kompletu Lurdes Turizão Cutinho, husi eskola Cafe Aileu ho idade 17, asumi kargu hanesan Xefe Estadu Maior General, FALINTIL – Forsa Defeza Timor Leste (F-FDTL) durante oras ida nia laran.
Durante oras ida nia laran, estudante Lurdes hanesan Xefe Estadu Maior General, FALINTIL – Forsa Defeza Timor Leste (F-FDTL) hodi lidera enkontru ofisial ho Xefe Estadu Maior General (F-FDTL), Tanente General Domingos Raúl “Falur Rate Laek, kona-ba preparasaun ba loron labarik feto nia iha loron 11 Outubru 2025.
Lurdes Turizão Cutinho espresa sentimentu urgulhu, tanba bele hetan oportunidade furak ida nee hodi asumi kargu hanesan Xefe Estadu Maior General, F-FDTL durante oras balun nia laran.
“Hau sente kontente tebes, maske ho idade neebe mak kiik maibe hau bele hetan oportunidade furak ida nee, agora daudaun hau sai nuudar Xefe Estadu Maior General (F-FDTL) durante oras balun nia laran, ida nee hanesan oportunidade furak ida mai hau,” dehan Lurdes ba jornalista sira hafoin oras ida nia laran sai Xefe Estadu Maior General, (F-FDTL) iha kuarter General Fatuhada, Sesta (10/10/2025).
Nia dehan, buat neebe mak motiva hakarak sai forsa mak, nia haree forsa sira servisu ho disiplina,.badinas, ho ida nee mak motiva nia, no nia mehi hakarak sai forsa iha futuru.
Iha fatin hanesan, Xefe Estadu Maior General, FALINTIL-Forsa Defeza Timor Leste (F-FDTL), Tanente General Domingos Raúl “Falur Rate Laek hateten, programa ida nee inisiativa husi PLAN Internasional hodi promove labarik feto sira.
“Atividade nee inisiativa husi organizasaun PLAN Internasional, sira nia inisiativa hodi promove labarik feto sira husi kiik too boot, tanba sira iha misaun importante ida, halo edukasaun mentalidade ba labarik sira, sira halo ida nee ho inisiativa, hau fo korajen ho vontade hodi atinji futuru neebe nabilan ba sira,” katak Falur.
Falur Fundamenta, objetivu neebe mak ohin nia simu sai hanesan memoria ida ba ninia kareira sira, nunee aban bainrua bele alkansa ninia objetivu.
“Hau hasoru nia, simu ho diak tau chapeu, no simbolu ida nee katak objektu sira neebe mak nia simu sai hanesan memoria ba nia kareira sira, tau iha nia fatin haree hanoin ba oin luta, aban bairua hakarak alkansa nia objetivu,” tenik Falur.
Entretantu Eta Mota hanesan responsabilidade ba programa PLAN Internasional fundamenta, programa nee parte husi PLAN Internasional neebe hahu iha tinan 2011, neebe mak Nova Yorke deside loron ba labarik feto sira hodi bele promove labarik feto sira, oinsa aprende kona-ba lideransa nia.
“Hanesan tinan-tinan ami selebra loron labarik feto nian iha 11 Outubru, programa ida nee hahu husi 2011, depois halo advokasia boot iha 2011, nunee Nova Yorke deside loron ida ba labarik feto sira, nunee loron ida nee ita uza labarik sira, foti papel lideransa atu sira mos bele aprende kona-ba oinsa sai lideransa, ami espera katak aprende husi lideransa ida nee bele motiva no empodera sira, nunee loron ida sira iha mehi neebe mak iha bele sai realidade,” tenik Eta.
Jornalista: EST 1
Editor: Xisto Mendonça
