DILI, STLTIMORLESTE.com – Sala 8 husi Eskola Baziku Sentral (EBC – sigla português) Fatumeta presiza halo reabilitasaun no sala 7 tenke halo konstrusaun foun, atu nunee bele fasilita estudantes iha prosesu aprendizajen.
Asuntu nee hatoo husi Diretor EBC Fatumeta, Cornelio Sequeira dos Santos ba jornalista STL iha nia knaar fatin Fatumeta, Kuarta nee (14/05/2025).
“Kona-ba sala agora daudaun nee sufisiente hela, ami nian eskola ida nee fahe ba turnu rua, ba oetavu ano no nono ano nee ba parte dader, setimu ano ba parte loraik, los duni durante nee ami halerik ba sala de aula, tanba laos diak hotu, maibe ami husu ba ME, ba ami nian sala balun neebe ninia kondisaun aat ona, atu nunee bele halo reabilitasaun para ba futuru ami nian sala de aula diak. Sala neebe mak atu halo reabilitasaun nee mak sala aula iha andar, tanba ninia plafon, odamatan, azulezu, janela sira aat hotu ona,” nia esplika.
Nia dehan, sala 8 parte andar ninia, nee presiza halo reabilitasaun no sala 7 neebe daudaun nee uza kalen mak taka nee presiza halo konstrusaun foun, tanba nee ba futuru sobu fali sala 7 lori kalen didin nee, halo fali konstrusaun foun ho fasilidade kompletu no halo andar para bele fasilita estudantes sira.
“Total ami nian estudantes iha nee hamutuk 906, profesor hanorin iha nee 42, tanba nain 2 moras permanente ona, ida seluk agora moras tan ona, nee duni ami nian profesores efetivu iha nee hamutuk 42,” tenik nia.
Iha fatin seluk, Diretor EBC Manleuana, Carlos Correia hatete, konstrusaun sala de aula husi eskola ida nee tekniku husi ME mai sukat ona, maibe konstrusaun refere sei adia ba tinan oin, maske tekniku mai sukat ona.
Entretantu Diretor Diresaun Nasional Infraestrutura no Edukativu iha ME, Helio Lopes antes nee hatete, tanba nee halo prioridade hirak nee fazeadamente, moru talvez ba tinan sira tuir mai, no agora konsentra ba fasilidade importante sira hanesan sala aula, haris fatin, instalasaun bee moos, sala profesor.
“Moru protesaun ME sei konsidera iha tinan orsamentu tuir mai, tanba eskola barak presiza moru, maibe ita nia orsamentu ita konsentra ba fasilidade salas de aulas, sala profesor nia, ita fo instalasaun bee moos ba eskola sira. Ita prioritiza hirak nee, hafoin ita halo konstrusaun ba moru iha eskola sira neebe la iha. Ita labele halo uluk konstrusaun ba moru maibe iha kazu balun neebe eskola balun presiza tebes sala de aula, entaun ita responde lai sala aula sira nee para estudante sira iha kondisaun ida neebe diak hodi partisipa iha ensinu aprendizajen,” dehan Helio.
(jac)
