AMBENO, STLTIMORLESTE.com – Diretor Eskola Bazika Sentral (EBC – sigla portugues) Mahata preokupa ho kontentor no kobe house neebe tau iha areador eskola, proposta hatama kleur ona ba Autoridade Rejiaun Administrativa Espesial Oekusi-Ambeno (RAEOA), maibe ate agora seidauk iha resposta hodi muda sai ba fatin seluk.
Preokupasaun nee hatoo husi Diretor EBC no Eskola Filial Mahata, Carlos de Fatima Almeida ba STL iha ninia servisu fatin Mahata, Suku Kutete, Postu Adminstrativu Pantemacassar RAEOA, Kinta (07/08/2025), katak proposta nee diriji kleur ona ba governu autoridade RAEOA liu husi Sekretaria Rejional Edukasaun no Asuntu Sosial, maibe ate agora seidauk iha resposta.
“Ami hatama ona proposta kleur ona ba Governu Autoridade RAEOA liu husi Sekretaria Rejional Edukasaun no Asuntu Sosial (SREAS), Inacia Tamele, maibe ate agora seidauk muda kontentor no Kobe House sira nee.
Instituisaun PNTL liu husi Polisia Unidade Fronteira (UPF) ho Imigrasaun lori ekipa pezadu boot ida mai tau iha areador eskola nee tanba foin lalais nee ami rona informasaun sira koopera ho Obras Publiku, konsege muda sai ona Kobe House 2 iha nee ba fronteira. Agora ekipamentu atu hiit kontentor sira nee, rai hela iha areador EBC Mahata, sei bele husu ba SREAS koordena ho operador nee atu muda sai ona kontentor sira nee, sei sira lakohi muda, ami sei husu ajuda loja cineza sira iha Oecusse atu tulun ami muda sai kontenor sira nee ba fatin seluk, tanba fatin sira nee ami presiza atu luan hodi kria programa eskola nian ba estudante sira,” dehan nia.
Nia haktuir tan katak, dadaun nee utiliza material lokal hanesan ai no tali tahan neebe apoiu husi oan estudante sira atu harii tan uma ida iha nee atu utiliza ba sala aprendizajen, nunee mos utiliza osan konsensoens hodi harii fatin nee, atu uza hanorin labarik sira.
“Difikuldade seluk neebe maka ami hasoru maka libru atu hanorin labarik sira, tanba foin lalais husi parte edukasaun rejional distribui libru balun mai iha nee maibe latoo, tanba nee ami presiza livru, atu transfere siensia no matenek ba estudante sira bazeia ba kurikulu neebe iha,” afirma nia.
Nia dehan, total estudante EBC Mahata hamutuk 337 no profesores neebe hanorin iha EBC Mahata hamutuk 11 pesoas profesor.
Hatan ba preokupasaun Kontentor hirak nee, Sekretaria Rejional Edukasaun asuntu Sosial, Inacia Tamele dehan, preokupasaun kona ba kontentores ida nee laos foin sira preokupa, tinan kotuk mos sira preokupa kestaun nee.
“Ami mos fo karta ba Sekretariu Rejional Asuntu Saude no Sekretariu Rejional Teras Propriedade no Serbisu kadastru, maibe too agora muda kontentor sira nee, maibe ami sei muda tanba atu halao prosesu aprendizajen neebe ke diak, uma mos tenke diak, embairoment mos tenke apoiu, tanba labarik sira neebe apriende siensia, tenke moris iha ambiente ida neebe saudavel,” dehan nia.
Tuir observasaun STL iha Terenu, kontentores ho kobe house sira nee, governu Autoridade RAEOA dahuluk neebe lidera husi Eis Primeiru Ministru no Prezidente Autoridade RAEOA dahuluk, Marii Alkatiri maka harii ho objetivu simu vizitor sira husi rai liur no ema ruma husi nasional pasa ferias iha Oecusse, bele hela provizoriu iha fatin refere no iha momentu neeba selebra tinan 500 evangelizasaun tama Timor Leste liu husi odamatan Lifau, bainaka barak maka hela iha kobe House sira nee kuaze semana ida ba eventu boot nee iha Oecusse.
(jos)
