DILI, STLTIMORLESTE.com – Ensinu Baziku Sentral (EBC – sigla português) Manleuana hetan apoiu meza no kadeira hamutuk 150 husi Ministériu Edukasaun (ME) ho UNICEF.
Tuir Diretor EBC Manleuana, Carlos Correia ba jornalista STL iha nia knaar fatin Manleuana, Sesta nee (20/06/2025).
“Ami nian meza kadeira kompletu ona ba ami nian estudantes sira, tanba foin daudaun ami hetan apoiu tan meza no kadeira husi Ministeriu Saude hamutuk 100, no husi UNICEF 50, nee duni hamutuk 150, tanba nee meza kadeira sufisiente ona ba ami nian estudantes sira hodi uza tuir prosesu ensinu aprendizajen iha sala. Nee duni ami nian sala de aula 15 nee meza kadeira kompletu ona, ami laiha problema kona-ba meza kadeira,” dehan nia.
Carlos dehan, meza kadeira neebe sira hetan apoiu husi ME no UNICEF nee atu bele fasilita estudantes sira iha ensinu aprendizajen husi profesor sira, tanba eskola ida nee kada tinan numeru estudantes sempre aumenta no fasilidade kompletu, nunee bele responde nesesidade eskola nian.
“Ita boot sira hatene katak, ita nian komunidade neebe hela besik eskola ida nee, sira nian oan tama hotu iha eskola ida nee, entaun ita tenke prepara fasilidade hirak nee sufisiente ba ita nian estudantes sira,” katak nia.
(jac)
