DILI, STLTIMORLESTE.com – Eskola Ensinu Baziku Sentral (EBC – sigla português) Manleuana halo karta pedidu ba Ministeriu Edukassun (ME) liu husi Edukasaun Munisipiu Dili, husu substitui profesores neebe tama ba idade reforma, tanba menus profesores.
Lia hirak nee hatoo husi Diretor EBC Manleuana, Carlos Correia ba STL iha nia knaar fatin, Kinta nee (07/11/2024).
“Ami nian profesores neebe mak tama ba idade reforma nee hamutuk nain 5, nee duni ami sei menus profesores, tanba nee ami halo ona karta ida ba iha ME, ho nunee bele substitui ba ami nian profesores neebe mak tama ba iha idade reforma, maibe too agora husi ME seidauk fo resposta mai,” nia afirma.
Nia dehan, pedidu neebe mak hatama ona ba ME nee ninia rezultadu seidauk iha, maibe nuudar Diretor husu nafatin ba ME liu husi rekursu umanu, para bele fo resposta ba sira nian karta neebe mak hatama tiha ona.
Nia katak, eskola nee kada tinan numeru estudantes sempre aumenta beibeik, no realidade neebe agora iha, profesor sira hanorin troka malu deit, tanba sei menus profesor.
(jac)
