DILI, STLTIMORLESTE.com – Ensinu Baziku Sentral (EBC – sigla português) ho ninia filial tolu mak hanesan EBF Fomentu, EBF Beduku no EBFCasnafar, sei halo lansamentu uniforme nasional.
Lia hirak nee hatoo husi Diretor EBC Manleuana, Carlos Correiaba jornalista STL iha nia knaar fatin Fatumeta, Kuarta nee (30/07/2025).
“Kona-ba uniforme nasional nee agora ami sei feriadu hela, bainhira tama fali eskola ami hahu halo ona lansamentu uniforme nasional, tanba ami nian uniforme nee ami prepara tiha ona, ami sei konvida Diretor Edukasaun Munisipiu, nunee mos Diretor Jeral bele mai partisipa iha ami nian lansamentu uniforme,” nia informa.
Carlos dehan, farda iha oin rua, ida kona-ba desportu nian no ida seluk mak uniforme nee, ida uniforme nee inan aman hatama osan US$ 15, nee ba estudantes EBC no Estudantes EBF US$ 14, farda desportu kada estudantes inan aman hatama osan US$ 10, EBC Manleuana iha ninia EBF tolu.
“Ita halo lansamentu uniforme nee hamutuk ho EBF tolu, nee mak hanesan EBF Fomento, EBF Kasnafar no EBF Beduku. Total estudantes husi sentral EBF tolu nee hamutuk 3300 resin,” katak nia.
Entretantu Diretor Eskola Sekundariu FINANTIL, Aniceto Berlelo hatete, estudantes husi eskola FINANTIL maioria mai hola ona farda nee, farda nee oin tolu, ida training no rua uniforme nasional, nee duni depois de ezame estudantes husi eskola ida nee hahu uza ona uniforme nasional.
“Depois de ita nian estudantes sira remata ezame, tama fali eskola nee estudantes sira hahu uza ona uniforme nasional, agora sira neebe mak lakohi uza nee ita sei haruka sira fila fali ba uma no inan aman tenke mai, tanba ita halo ona lansamentu ba uniforme nee iha tinan kotuk no eskola hotu tenke uza uniforme nasional, nee duni estudantes husi eskola ida nee depois de ezame segundu periodu estudantes sira tama fali eskola nee hahu uza uniforme nasional,” dehan nia.
Iha fatin seluk, Diretor EBC 10 Dezembru Komoro, Calistro A. Giterres hatete, kona-ba uniforme nasional, inan aman estudantes sira mos konkorda hotu katak, oinsa mak estudantes sira bele uza uniforme nasional.
(jac)
