DILI, STLTIMORLESTE.com – Eskola Baziku Filial (EBF) Aituri Laran hetan apoiu kaderneta 100 husi Ministeriu Edukasaun (ME).
Asuntu nee hatoo husi Koordenadora EBF Aituri Laran, Gracinda Morreira de Araujo Tilman ba STL iha nia knaar fatin, Kinta nee (14/11/2024).
“Kona-ba kaderneta hau sente sufisiente ona ba ami nian estudantes sira, tanba foin lalais ami hetan orientasaun ida, hodi ba foti kaderneta fo ba ami nian profesor sira para bele prienxe estudantes sira nian valor. Total kaderneta hamutuk 100 neebe mak aloka mai iha fulan kotuk, ba foti iha Edukasaun Munisipiu Dili ninia,” dehan nia.
Nia hatutan, ho apoiu kaderneta nee sufisiente ona ba sira nian estudante sira. Total profesores hamutuk 24 no estudantes 1042, sala aprendizajen hamutuk 10.
Iha fatin seluk, Koordenador Gabinete Unidade Kurrikulu Nasional Ministeriu Edukasaun ME, João Maupelu hatete, kaderneta neebe imprimi iha sentru impresaun nee ba kada nivel eskolaridade, produs 40 mil ital distribui hotu ona.
“Primeiru periodu nee ita fo tiha ona kaderneta, ita imprimi sentru iha kada nivel eskolaridade ita produs 40 mil ital iha sentru, nee ita distribui hotu ona, agora sira produs hela iha neeba, uluk nee kada nivel pre eskolar 40 mil, primeiru no segundu siklu kaderneta nee 40 mil, depois terseiru siklu 40 mil, sekundariu 40 mil, ba tekvo kaderneta sufisiente ona. Agora iha armajen ita prepara hela kaderneta ho montante hanesan nee, ita sei distribui fim de tinan ida nee,” nia dehan.
Nia afirma, hanesan foin daudaun Dili sira presiza tan kaderneta purvolta 5 mil, sira mai koalia no ba iha armajen para sira bele mai foti direita, kada nível eskolaridade produs kaderneta 40 mil, maibe ida nee produs fahe hotu ona.
(jac)
