BAUKAU, STLTIMORLESTE.com – Eskola Ensinu Bazika Filial (EBF) Belavista iha Suku Builai, Postu Administrativu Baukau Vila, Munisipiu Baukau, sei menus kaderneta eskolar, tanba nee valor estudante prienxe iha papel kaderneta.
Preokupasaun nee hatoo husi Koordenadora EBF Belavista, Cesarina de Jesus Gusmão ba jornalista STL iha Belavista, Baucau, Segunda (05/01/2026).
Nia dehan, ezame hotu valor estudante sira nia prienxe iha kaderneta, maibe kaderneta laiha, entaun valor prienxe iha kaderneta papel.
“Kuandu ezame hotu atu prienxe valor kaderneta laiha, ami prienxe valor iha kaderneta papel. Relasiona asuntu nee ami hatoo ba sentru, nunee mos sentru hatoo ba Edukasaun Munisipal,” dehan nia.
Nia katak, kaderneta la too tanba nee iha 2026 kaderneta fo ka lae, tanba kaderneta la too, entaun uza deit kaderneta papel tau valor husi primeiru periodu, segundu periodu no terseiru nian. Antes seidauk sai koordenador nee kaderneta laiha ona, laos foin akontese, tanba durante nee sempre uza kaderneta papel nee.
Nia dehan, antes nee estudante balun iha kaderneta no balun laiha, tanba nee estudante barak laiha entaun sira uza kaderneta papel.
Uza kaderneta papel enfrenta ba estudante sira, sala ruma estudante sente iha eskola seluk iha kaderneta, maibe iha eskola nee uza fali kaderneta papel.
Tanba nee relasiona kaderneta neebe menus, Koordenador nee husu ba Ministeriu Edukasaun, se bele iha 2026 kuandu distribui kaderneta ba eskola tuir numeru estudante neebe iha. Ezemplu iha eskola EBF estudante hamutuk 300 resin, entaun kaderneta fo hanensan numeru estudante neebe iha, se distribui kaderneta la tuir numeru mak se la too.
Nia dehan, kaderneta eskolar importante tanba hodi prienxe valor, tanba iha estudante inan aman balun neebe kestiona estudante iha sestu ano fo deit kaderneta papel.
“Inan aman dehan ami nia oan iha tinan 6 tur iha ensinu baziku fo deit ho surat tahan, hau dehan ida nee tenke fo, tanba laiha kaderneta laos tinan 2025, maibe tinan uluk uluk mos hanesan,” nia tenik.
Nia hatutan, nia parte sujere ba sentru la fo lalais, ba iha Diresaun Edukasaun Munisipal parte kaderneta eskolar nian para husu, labele laran metin deit ba sentru halo ka lae, nee mak tenke husu direita. Eskola EBF Belavista nee ho total estudante hamutuk nain 312, no total profesores hamutuk nain 11.
Jornalista: Joaninha Belo
Editora: Domingas Gomes
