BAUKAU, STLTIMORLESTE.com – Eskola Ensinu Baziku Filial (EBF) Uaiaka Mulia, Postu Administrativu Kelikai, Munisipiu Baukau menus profesores.
Koordenador EBF Uaiaka Mulia Cedelizio dos Reis esplika, eskola EBF Primeiru-Segundu siklu Uaiaka Mulia kompostu sala neen husi neebe antes nee responsavel kada sala estudante koloka profesores ida, maibe dadaun profesore nain ida la ativu hanorin, tanba kestaun kondisaun saude.
“Ativu ami nain lima deit fo impaktu ba estudante, tanba nia la mai ami bele priense, maibe ami halai fali ba sorin entaun sala ida tenke mamuk, ami halai mai fali sorin, sorin sai mamuk,” hateten Cedelizio ba STL iha Vila Nova Baukau, Segunda (23/06/2025).
Nia sublina, profesor neebe kondisaun saude la permite hanorin estudante sira, responsabiliza ba estudante segundu anu neebe durante prosesu aprendizajem inisiu anu letivu 2025 la efetivu hanorin, tanba kondisaun saude.
Nunee estudante segundu anu sempre apoiu materia aprendizajem husi profesores klase seluk, maibe nee fo impaktu ba estudante sira, tanba estudante klase seluk tenke abandona, bainhira ativu iha sala estudante segundu anu.
“Ami prezisa, se estadu bele karik tau profesores iha nee para kompleta, tanba ami iha nee koordenador hotu-hotu hanorin,” Cedelizio sujere.
Koordenador EBF Uaiaka nee rekomenda ba parte kompetente atu koloka profesore hodi bele reforsa prosesu aprendizajem eleva kualidade Edukasaun.
Liga asuntu refere STL tenta komfirma Diretor Servisu Munisipal Edukasaun Baukau, maibe laiha fatin atu fo komentariu, tanba tuir hela enkontru importante balun iha fatin seluk.
Entertantu total estudante iha eskola ensinu baziku primeiru-segundu siklu filial Uaiaka Mulia hamutuk 259 kompostu sala neen.
(jac)
