DILI, STLTIMORLESTE.com – Edifisiu foun Tribunal Judisial Primera Instansia Dili (TJPID) sei inaugura iha fulan Dezembru, depois inaugura sei utiliza imediatamente hodi halao julgamentu ba prosesu sira.
Dehan Prezidente Tribunal Rekursu (PTR), Deolindo Dos Santos ba jornalista sira iha Kaikoli, Dili, Kuarta (06/11/2024).
“Foin daudaun ba iha Komisaun A Parlamentu Nasional, hau hateten ba sira katak, hau lakohi halo promesa maibe hau hateten ba sira tenke inaugura iha tinan nee nia laran, pelu menus mais tarde iha Dezembru,” dehan PTR, Deolindo.
Nia hatutan, sei organiza buat balu hodi finaliza obra ida nee, tanba iha obra kiik oan balu tenke kaber ho Empreza neebe harii mak estrada tama ba nee. Tanba momentu neeba sira halo iha tempu udan, estrada nakfera balu la kaber, husu atu sira halo kompleta fali, no sira halo hotu ona iha semana balu liu ba, tanba nee sira nia parte hotu ona.
“Parte kiik oan balu neebe la iha relasaun ona ho Empreza neebe harii, mak falta letra bee tanki no jardim sira neebe pinta, no mos odamatan elevador nian, empreza seluk ida mak halo maibe hotu ona, no planu hela atu inaugura iha tempu badak nia laran,” dehan nia.
PTR sublina, planu atu inaugura hanoin atu halo iha Novembru nia laran, maibe primeira obra neebe Tribunal halo orsamentu estadu nian, no iha inaugura nee hanoin atu envolve mos autoridade sira hanesan mos iha momentu halo lansamentu ba kontrusaun nee.
No haree ba ajenda autoridade sira seluk nian, la iha kondisaun atu inaugura iha fulan Novembru, tanba iha ajenda seluk iha mos informasaun katak, selebrasaun 28 Novembru sei halao iha Oekusi, signifika katak Governu rasik sei organiza eventu balu iha neeba, no deslokasaun lori tempu, la iha kondisaun Inaugura iha fulan ida nee, no planu hela atu inaugura iha primera semana fulan Dezembru nian.
Iha fatin ketak, Akademiku UNTL, Sebastiao Dos Santos dehan, kondisaun Tribunal Dili nian tuan nee ladun diak ona, tanba nee tenke utiliza edefisiu foun.
“Ita haree kondisaun Tribunal Dili nian la dun diak ona, presiza duni uza edefisiu foun atu tulun autores judisial sira halao knaar,” dehan nia.
(ter)
