BAUKAU, STLTIMORLESTE.com – Vigariu Episkopal Asuntu Sosial no Edukasaun, Padre Evaresto António da Costa ofisialmente fo bensaun ba edifisiu eskola Ensinu Baziku Filial Katolika Bualale, iha Postu Administrativu Kelikai, Munisipiu Baukau, hafoin hamutuk ho Padre Parokia Santa Terezinha Kelikai inaugura eskola refere.
Vigariu Episkopal Asuntu Sosial no Edukasaun, Padre Evaresto António da Costa hateten, orsamentu ba konstrusaun edifisiu eskola EBF Katolika Bualale aloka husi Governu, tanba igreja nuudar parseiru Governu nian neebe Dioseze Baukau liu husi kompanhia konstrui eskola refere hamutuk sala 4 neebe finaliza iha tinan 2025.
“Inaugura no bensaun ba eskola nee para ita nia oan sira bele uza aprende buat ruma ba sira nia vida moris, eskola nee sala 4 maibe fasilidade seidauk iha ba oin sira sei halo pedidu ida ba Diozese liu hus fundasaun São José para bele aranja fasilidade ba sira,” hateten Pe Evaresto ba STL hafoin remara inaugura no fo bensaun ba infraestrutura edifisiu EBF Bualale, Segunda (09/02/2026)
Padre nee rekoinhese, mezmu edifisiu foun eskola EBF Bualale inauguradu no hetan ona bensaun, maibe sei falta mobiliariu no fasilidade seluk tan, tanba nee husu parte eskola atu diriji pedidu ba Dioseze Baukau liu husi Fundasaun São João nunee hetan mobiliariu no fasilidade seluk hodi utiliza iha eskola refere hadia kualidade edukasaun.
Tanba Padre nee konsidera, eskola mak fatin neebe atu hadia no fo treinu vida fizika, vida intelektual no vida moral ba labarik sira iha eskola refere.
“Hau hanoin Edukasaun ida atu lao ba oin prezisa hadia vida moral ba labarik sira, tanba ita haree eskola barak mais labarik sira nia dekadensia moral nee prezisa hadia liu husi formasaun uma laran, liu husi profesores sira, mais eskola laos atu buka matenek deit, maibe prezisa mos eduka sira iha vida espiritual orienta sira ba misa no reza nee mak eskola Katolika nia karakter, orienta sira sai Katolika no sidadaun Timor loloos,” Padre Evaristo komenta.
Padre nee katak, eskola Katolika mak eskola neebe karakter atu eduka estudante sarani Katolika nia vida espiritual liu husi orienta ba misa no reza inklui forma estudante sira sai Katolika no sidadaun Timoroan lo-loos, maibe rekonhese eskola Katolika iha Diozese Baukau liu 130 resin mak kondisaun sei aat, tanba eziste ona tinan naruk.
Maibe parte Dioseze sei hadia fazeadamente too hotu, tanba kada tinan Governu aloka orsamentu liu husi Suvensaun Publiku ba Diozese atu hadia infraestrutura eskola sira no seluk tan hodi fo benefisiu ba estudante sira iha eskola Katolika nian liu liu iha Dioseze Baukau.
Koordendor eskola Ensinu Baziku Filial Katolika Bualale Evangelino Freitas agradese tanba Eskola Ensinu Baziku Filial Katolika Bualale iha ona edifisiu foun, maibe seidauk sufisiente, tanba total estudante neebe halao aprendizajen iha eskola refere hahu husi primeiru anu too sestu anu, maibe sla foun neebe konstrui iha deit sala 4, kompostu sala ba ensinu aprendizajem 3 no ida ba edifisiu profesores.
“Ami agradese ba fundasaun Dioseze Baukau konstrui ona ami nia edifisiu eskola sala 4, sala seidauk too tanba alunu husi primeiru anu too sestu anu, maibe ita hein oituan tanba Dioseze halo eskola nee barak laos Bualale deit, neebe ita pasiensia hein,” dehan nia.
Entretantu edifisiu eskola refere fo benefisiu ba estudante hamutuk 68 kompostu feto mane.
(tom)
