BAUKAU, STLTIMORLESTE.com – Edifisiu eskola iha Munisipiu Baukau hamutuk unidade tolu (3) hetan estragra husi ema deskonhesidu.
Diretor Servisu Edukasaun Munisipiu Baukau, Afonso dos Santos da Costa informa, inisiu anu letivu 2025 husi fulan Janeiru too Abril nee, Servisu Edukasaun Munisipiu Baukau simu informasaun husi responsavel eskola sira, kuaze eskola balun hetan estragus husi ema deskonhesidu.
“Eskola sira neebe hetan estragus ida iha Afasa, Gariuai no Sekundaria 02 Vila Nova, sira hanoin osan mak iha laran sobu odamatan janela tama ba laran, afinal osan laiha, sira tama fali eskola neeba halo saida,” hateten Afonso dos Santos da Costa ba jornalista STL iha Vila Nova, Baukau, Kurta (23/04/2025).
Nia sublina, eskola tolu neebe ema deskonhesidu halo estraga liu-liu Ensinu Baziku Sentral Afasa Postu Kelikai Antigu sobu janela iha parte edifisiu ba profesores sira, enkuantu Ensinu Baziku Gariuai no Sekundaria 02 Vila Nova iha Postu Baukau Vila sobu odamatan parte edifisiu ba profesores sira tama hodi foti fasilidade sira neebe iha.
Nia fundamenta, fasilidade neebe ema deskonesidu foti iha Eskola Afasa mak hanesan espiker bluetooth ida, box wireles ida, nomos ekipamentus konstrusaun hanesan bor ida ho gerinda ida, enkuantu iha eskola rua seluk kuaze fasilidade la lakon, maibe sobu odamatan hodi estaga fasilidade sira hanesan meza no kadeira.
“Buat hotu ita para iha Polisia, neebe Polisia ho Edukasaun servisu hamutuk diak tebes, maibe ema deskonhesidu tama kalan,” Afonso dos Santos da Costa akresenta.
Diretor Edukasaun Munisipiu Baukau nee argumentu, hafoin akontese ema deskonhesidu estaga edifisiu eskola, responsavel eskola sira hatoo kedas informasaun ba Servisu Edukasaun Munisipal no kontinua relata kedas ba parte Komando Polisia Munisipiu Baukau, maibe ema deskonhesidu estraga edifisiu iha tempu kalan, nunee labele halo identifikasaun.
Nunee nia husu komunidade sira neebe hela besik iha areadores eskola nian, ajuda setor edukasaun hodi tau matan no kuida fasilidade neebe iha, nunee bele fasilita estudante sira lao ho diak iha prosesu aprendizajen.
Maibe bainhira la tau matan no kuida, fasil ema deskonhesidu sira estraga fo impaktu ba estudante sira iha tempu aprendizajen, bainhira fasilidade la kompletu.
Tanba seidauk prioridade atu koloka seguransa no konstrui moru protesaun iha tinan nee, razaun sei haree asuntu barak hanesan infraestrutura edukasaun no menus profesores inklui meza kadeira ba estudante sira neebe iha eskola balun sei menus.
Entretantu edifisu eskola neebe eziste iha Munisipiu Baukau hamutuk 258 kompostu Pre-Eskolar 51, Ensinu Baziku Primeiru no Segundu Siklu 163, Ensinu Baziku Terseiru Siklu 17, Ensinu Sekundaria Sentral no Filial 23 no Tekniku Vokasional 5.
(tom)
