BAUKAU, STLTIMORLESTE.com – Organizasaun Raes Hadomi Timor Oan (RHTO) preokupa edifisiu publiku sira iha Munisipiu Baukau, balu laiha asesibilidade ba Ema ho Defisiensia (EhD) atu asesu.
Fiel oficer RHTO Munisipiu Baukau, Ediziana Eliza Belo informa, edifisiu publiku iha Munisipiu Baukau hamutuk 10 resin iha neebe edifisiu publiku neebe maluk Ema ho Defisiensia nesesariu atu asesu mak, edifisiu Administrasaun Autoridade Munisipiu Baukau, Komando Polisia Munisipiu Baukau, Notariadu, STAE, Edukasaun no seluk tan, maibe edifisiu neebe iha ona asesibilidade, mak hanesan Servisu Munisipal Edukasaun no Notariadu, enkuantu seluk sei falta asesibilidade ba Ema ho Difisiensia atu asesu bainhira iha nesesidade nesesariu.
“Edifisiu barak mak seidauk iha asesibilidade nee difikulta tebes maluk kondisaun difisiensia liu liu defisiensia matan total no difisiensia fiziku neebe uza kadeira roda, tanba laiha rampa no fatin neebe asesivel atu asesu trata dokumentus ruma,” hateten Ediziana ba STL, iha knaar fatin Planaltu Vila Nova, Baukau, Sesta (15/07/2025).
Nia esplika, edifisiu hanesan Komando Polisia Munisipiu Baukau EhD mos iha nesesidade atu asesu kona-ba kazu ruma, nunee mos edifisiu Administrasaun Autoridade Munisipiu Baukau, inklui edifisiu STAE Baukau EhD iha nesesidade atu asesu nomos edifisiu seluk tan neebe durante difikulta EhD atu asesu, tanba laiha asesibilidade.
Aleinde edifisiu publiku, salaun Sentru Konvensoens Vila Antiga neebe atividade husi Governu hanesan desminasaun, sosializasaun no atividade seluk tan sempre realiza iha fatin refere neebe mos hetan partisipasaun husi reprezentante EhD ho kadeira roda, maibe laiha rampa atu fasilta.
“Fatin hirak nee kondisional tebes atu tau ramba, razaun tanba dala barak maluk Ema ho Difisiensia sira ho kadeira roda labele asesu susar,” nia sublina .
Tanba nee husu parte relevante sira hanesan dirijente STAE no diresaun seluk tan prezisa kria kondisaun ba EhD liu husi estabelese asesibilidade iha edifisiu sira, nunee bainhira EhD iha nesesidade nesesariu bele asesu edifisiu ho seguru.
Iha sorin seluk EhD utiliza kadeira roda, Tomas Martins Gusmão hateten, asesibilidade ba EhD importante tebes, tanba laiha asesibilidade ba EhD iha edifisiu ida susar atu EhD neebe utiliza kadeira roda asesu edifisiu.
“Agora dadaun dezenvolvimentu iha edifisiu publiku sira balun iha ona rampa, maibe hanesan STAE nafatin bareira, tanba fatin sanitariu neebe iha seidauk asesivel ba Ema ho Defisiensia, ida mak BNCTL neebe fo atendimentu publiku iha neeba eskada aas tebes, ida mak edifisiu Administrasaun Autoridade Munisipiu Baukau dala barak ami asesu liu husi kotuk, iha oin laiha asesibilidade,” katak Tomas.
Liga asuntu nee jornalista STL tenta konfirma Diretor STAE Munisipiu Baukau, maibe la fo komentariu, tanba sei lisensa mensal.
Entertantu Ema ho Defisiensia neebe rejistradu, iha Munisipiu Baukau hamutuk rihun 5 resin.
(tom)
