DILI, STLTIMORLESTE.com – Eletrisidade Timor Leste, Empreza Publiku (EDTL, E.P) presiza profisionaliza servisu, nunee bele funsiona enerjia eletrika iha rai laran hodi kondisaun dignu iha sosiedade.
“Ita husu atu EDTL, E.P diak liu buka enerjia no alternativu seluk, tanba oli pejadu ida iha hela nee sensitivu liu, bainhira udan makaas, anin makaas, funsionalidade ba enerjia eletrika halo ahi mate lakan, presiza hadia no aumenta profisionalidade servisu,” dehan Diretor Ezekutivu, husi Luta Hamutuk (LH), Jose Alves da Costa ba STL iha nia knaar fatin Farol, Dili, Segunda (28/10/2024).
Tuir Jose, oli pezadu iha Hera makina sensitivu liu no kustu mos boot, tanba nee Governu presiza buka alternativu seluk hodi kualifika enerjia eletrika iha TL ho diak.
Tanba halo ahi mate lakan bele estraga komunidade nia sasan, hanesan refrijerator sira no sasan uma laran sai aat hotu, pior liu super merkadu sira, ai-haan iha jelheira sai dodok hotu, entaun kondisaun sira nee sujere ba Governu, liu-liu EDTL, E.P buka alternativu hodi hadia enerjia eletrika iha TL ho diak.
Iha fatin seluk, Xefe Suku Kolmera, Moises hatete, sente triste tebes ba servisu iha EDTL, E.P nian, tanba konsidera sidade sai foho, halo ahi mate lakan, mate lakan, hanoin katak kondisaun sira nee presiza troka servisu no aumenta profisionalidade servisu ho diak.
Komunidade iha teritoriu nasional dependensia ba enerjia eletrika ka eletrisidade, balun halo bussines, la halo busines sira, uza hotu enerjia eletrika, tanba nee kuandu ahi moris ho kondisaun ida lafavoravel mak sei estraga hotu sasan komunidade nian.
Iha sorin seluk, Komunidade iha Suku Bairo Pite, Angela Ximes Rego afirma, eletrisidade nee sai preokupasaun ba komunidade iha teritoriu nasional, liu-liu komunidade sira iha sidade Dili, tanba hotu-hotu dependensia ba enerjia eletrika.
Tanba nee mak husu ba Governu atu kria kondisaun neebe diak, hadia eletrisidade ho kualidade diak, karik labele uza ona oli pezadu sira, diak liu buka alternativu seluk hodi dezenvolve enerjia elétrika ho diak, nunee bele funsiona preokupasaun sosiedade nian sai efetivu.
(EST 1)
