BAUKAU, STLTIMORLESTE.com – Relasiona komunidade husi Suku Uatilari, Aldeia Uaiharebo’o no Aldeia Kaidenulale husi Suku Ossoala iha Postu Administrativu Vemasi, neebe durante nee la asesu linha eletrisidade, ekipa nasional husi Eletrisidade Timor Leste (EDTL) lori kompanhia lokal 15 ba ona iha terenu vizita fatin (site visit) molok instala eletrisidade iha aldeia refere.
“Sim, agora sira iha neeba sukat lao tiha ona iha Aldeia Uaiharebo’o no Aldeia Ossoala nian, EDTL Nasional lori ona kompanhia 15 ba halo survei,” hateten Xefe Suku Uatulari, Venancio da Costa ba STL iha Vila Antiga, Sesta (27/06/2025).
Nia esplika, survei refere hahu iha loron 27 Junhu nee too termina, neebe nuudar faze inisiu halo preparasaun hodi hein ba prosesu tenderizasaun.
Nia haktuir, tuir informasaun husi ekipa EDTL katak, bainhira parte kompanhia relata survei, iha loron 22 Julhu tinan nee sei hahu ho prosesu tenderizasaun ba kompanhia 15, hafoin deside kompanhia manan nain halao servisu iha terenu.
“Iha Suku Uatilari sei halo instalasaun ba deit uma kain 93 iha Aldeia Uaiharebo’o, no Suku Ossoala nian mak ba Aldeia Kaidenulale Bairu Bubuomesa ho tan Komulale,” Venancio informa.
Xefe Suku Uatulari nee espresa sentimentu kontente, tanba parte relevante bele rona komunidade sira iha baze nia preokupasaun, maibe husu atu aselera prosesu survei no hakat kedas ba prosesu tenderizasaun, nunee bele implementa servisu iha tempu bailoron, tanba bainhira prosesu hotu tarde sei fo impaktu ba progresu, tanba kondisaun estrada aat neebe iha tempu udan nakfilak ba tau’u difikulta transporte sira asesu.
Xefe Suku Ossoala, Fransisco Gama da Costa informa, durante nee komunidade husi Aldeia Kaidenulale kompostu bairo Bubuomesa no Komulale ho total uma kain besik 100 mak durante nee la asesu eletrisidade, maibe agradese, tanba ekipa nasional husi EDTL lori ona kompanhia lokal sira too iha terenu halo levantamentu hodi hein ba tenderizasaun.
“Ohin nee kompanhia sira halo ona site visit kompanhia sira haree halo dezenhu BoQ tau orsamentu iha Julhu sira hatama ona setembru hanesan nee mak foin hatene rezultadu kompanhia neebe mak manan,” nia hakotu.
(tom)
