DILI, STLTIMORLESTE.com – Edukador kada loron sempre kumpri oras hanorin estudantes sira no sira halao knaar ho diak iha eskola, no dirijenti eskola mak halo kontrolu ba profesores sira.
Diretor Servisu Edukasaun Munisipiu Manatuto, Patricio da Cruz Quintão hatoo lia hirak nee ba jornalista STL liu husi telefone, Domingu nee (22/06/2025).
“Ita nian profesores sira nee husi kada eskola mak halo kontrolu ba sira nian prezensa iha eskola, oinsa dader tama eskola no sai husi eskola, maibe hau hanoin nuudar edukador sira hotu lao tuir orariu hanorin neebe mak iha ona, nee duni prosesu aprendizajen nee lao hanesan baibain,” dehan nia.
Nunee mos Diretor Servisu Edukasaun Munisipiu Ainaro, Patricio da Costa Magno hatete, profesores iha Munisipiu Ainaro hatene ona sira nia knaar, liu-liu sira neebe koloka ona ba eskola sira nee, maibe durante nee sira halao prosesu ensinu aprendizajen ba estudantes sira lao ho diak.
“Ita nian profesores iha Munisipiu Ainaro hatene ona sira nia knaar, liu-liu sira neebe koloka ona ba eskola sira nee, maibe durante nee sira halao prosesu ensinu aprendizajen ba estudantes sira lao ho diak,” nia afirma.
Iha parte seluk, Diretor EBC Manleuana, Carlos Correia dehan, profesores sira sempre kumpri oras hanorin nian, tama eskola iha nian regras ida para bele halo kontrolu ba profesores sira, nee adjuntu ninia servisu ida hodi haree ba asuntu ida nee.
“Hau haree ba injeral deit, kona-ba halo kontrolu ba profesores sira nee adjuntu mak halo, maibe profesor sira kumpri oras hanorin nian, tanba nee ami nian profesores idak-idak tama tuir oras, ho nunee bele hahu aprendizajen ba ami nian estudantes sira iha sala laran, depois sira halo planu de aula,” nia esplika.
Carlos akresenta, nuudar edukador sempre tama tuir oras, liu-liu kumpri orariu hanorin nee importante, maibe durante nee profesores husi eskola ida nee sempre halo tuir regras neebe mak iha ona.
(jac)
