DILI, STLTIMORLESTE.com – Nuudar edukador hanorin estudante sira iha aula tenke pasiensia no labele koalia hakilar, maibe koalia hamaus deit, atu nunee sira bele fo atensaun ba materia neebe halo esplikasaun iha oin.
Olinda da Silva hanesan profesora husi Ensinu Baziku Filial (EBF) Naroman hatete, hanorin iha Ensinu Baziku Filial nee mesak labarik kiik deit, ho ida nee manorin sira mak presiza pasiensia, tanba estudantes sira mai nee hahalok neebe la hanesan, balu tur hakmatek, balu hakilar no lakohi tur hakmatek, neebe sira idak-idak mai ho karakter neebe mak la hanesan ida.
“Ita nuudar edukador, ita tenke pasiensia mak barak, no ita tenke koalia beibeik ho ita nian estudante sira, labele hakilar sira, maibe koalia hamaus deit sira para labarik sira bele rona saida mak ita koalia ba sira, bainhira sira tur la hakmatek no hakilar iha aula laran, nee ita bolu koalia hamaus deit sira, ho nunee labarik sira bele atensaun ba ita nian materia neebe mak ita halo esplikasaun iha oin,” dehan nia.
Iha fatin seluk, Domingas Beatriz da Cunha hanesan Koordenadora Pre Eskolar Moris Foun I dehan, hanorin iha pre eskolar nee labarik idade tinan 4 ho 5, dala ruma sira mai fou-foun sei tanis, maibe tenke pasiensia para labarik sira bele toman lalais profesores sira.
(jac)
