DILI, STLTIMORLESTE.com – Servisu Edukasaun Munisipiu Ainaro la hatene bolsa kandidatu profesores nain 12 ninia hela fatin.
“Foin daudaun hau halo ona enkontru ho ita nian bolsa kandidatu profesores sira nee, hau bolu ita nian Diretor Ensinu Baziku sira nee mai hotu, ita nian bolsa kandidatu sira nee maioria mak ema Ainaro, husi munisípiu seluk nee iha deit nain 12, kona-ba sira nian hela fatin nee hau bolu Diretor Ensinu Baziku Central sira mai, atu nunee bele ba haree sira nian fatin. Ami ba ona ita nian eskola sira, nee duni agora sira hela ho komunidade sira ou sira hela iha kos, nee mak ami la hatene fali ida nee,” dehan Diretor Servisu Edukasaun Munisípiu Ainaro, Patricio da Costa Magno ba STL liu husi telefone, Segunda nee (09/03/2026).
Nia akresenta, Diretor Ensinu Baziku sira ba ona eskola sira, agora bolsa kandidatu nain 12 neebe mak daudaun nee hanorin iha Munisipiu Ainaro nee, ida husi Munisípiu Lautem, Manatuto nain 1, husi Aileu mak barak liu fali husi munisípiu seluk, inklui Dili nain 1, kona-ba sira nian hela fatin nee mak husi Edukasaun Ainaro ladun hatene.
“Ita nian bolsa kandidatu nain 12 nee hanorin iha nibel ensinu baziku hotu, ita nian profesores sira nee rezolve deit ba sira neebe mak reforma no moras permanente ninia, tanba nee kona-ba bolsa kandidatu sira nian hela fatin nee ita nafatin buka tuir sira nian hela fatin,” nia afirma.
Iha fatin seluk, Miguel Freitas hanesan Diretor Servisu Edukasaun Munisípiu Bobonaro hatete, bolsa kandidatu profesores sira nee aluga deit uma, tanba nee husi Edukasaun Munisípiu nafatin identifika profesores sira neebe mak hasoru dezafiu ba Sira nian hela fatin, tanba nee oinsa mak prepara rezidensia ba sira hodi bele fasilita sira nian hela fatin, atu nunee bele hanorin estudantes sira iha eskola.
“Dezafiu seluk mak ami hatoo ona liu husi vizitasaun Parlamentu Nasional ninia, liu-liu ba rezidensia ba profesores bolsa kandidatu sira nee, tanba balun mak hela hamutuk ho ita nian komunidade sira maibe sira aluga, nee mak bolsa kandidatu profesores sira hasoru dezafiu. Nee mak tuir planu ami nian no bainhira mak atu implementa buat nee, ami fahe tiha ona iha 33 rezidensia ba iha Munisipiu Bobonaro, ami fahe hotu ona ba eskola, maibe la hatene ninia realizasaun nee bainhira, ami hein deit,” nia informa.
(jac)
