BAUKAU, STLTIMORLESTE.com – Servisu Munisipal Edukasaun Baukau hatoo hotu ona kondisaun eskola aat sira ba Ministeriu Edukasaun (ME).
Diretor Servisu Munisipal Edukasaun Baukau, Afonso dos Santos da Costa hateten, Servisu Munisipal Edukasaun Baukau liu husi ekipa iha tinan 2025 halo ona levantamentu dadus, ba eskola kondisaun aat sira neebe eziste iha Munisipiu Baukau no relata ona, ba Ministeriu Edukasaun atu tau atensaun liu husi aloka orsamentu hodi halo reabilitasaun.
“Kondisoens eskola ensinu baziku sira neebe kuaze 100 liu ita hatoo nia kondisoens nee balu diak balu seidauk diak balu diak liu, entaun ida nee mak ita relata ba iha Ministeriu,” Afonso hateten ba STL, iha Vila Nova, Baukau, Kinta (04/12/2025).
Nia sublina, husi eskola Pre-Eskolar, Ensinu Baziku Sentral no Filial, Sekundaria Jeral no Filial neebe eziste iha Munisipiu Baukau liu 100 husi kondisaun diak no aat sira Servisu Munisipal kuaze relata hotu ona ba Ministeriu Edukasaun, maibe sei responde ba eskola kondisaun aat sira neebe presiza atu halo reabilitasaun no konstrusaun.
Maibe projetu reabilitasaun no konstrusaun atu akontese depende fila fali ba Ministeriu Edukasaun, tanba orsamentu hotu konsentra iha Nasional, maibe garante Ministeriu sei fo solusaun ba eskola sira neebe kondisaun aat, tanba Ministeriu Edukasaun mak nain ba Edukasaun.
“Ita rekomenda orsamentu sira neebe tau iha planu hahu husi nasional too iha baze, ita hamutuk para oinsa ita nia orsamentu sira neebe tau iha planu nee ita bele implementa ho diak iha tinan tuir mai,” Afonso rekomenda.
Iha sorin seluk Diretor eskola Ensinu Baziku Sentral Afasa, Agostinho Ximenes hateten, eskola Ensinu Baziku Sentral Afasa iha eskola filial hamutuk 7, maibe eskola 4 daudaun kondisaun aat.
“Eskola 4 mak la diak eskola EBF Uaidaboru, EBF Baguluru, EBF Eubere no eskola Uailikiluri nee mak kondisaun kakuluk la diak, ami hatoo tiha ona ba Ministeriu maibe seidauk iha atensaun,” Agostinho katak
Diretor eskola nee husu Ministeriu Edukasaun atu aloka orsamentu 2026 neebe aprova ona, tenke aloka barak liu ba infraestrutura Edukasaun nunee estudante sira bele asesu prosesu aprendizajem iha fatin seguru, tanba daudaun eskola barak iha remotas kondisaun aat no fo ameasa ba estudante sira nia vida, maibe obrigadu nafatin utiliza tanba laiha fatin alternativu ba prosesu aprendizajem.
Jornalista: Tomas Reis
Editora: Carme Ximenes
