BAUKAU, STLTIMORLESTE.com – Servisu Munisipal Edukasaun Baukau kontinua koordena ho entidades sira hotu, hodi tau matan ba Programa Merenda Eskolar iha nivel eskola sira.
Diretor Servisu Munisipal Edukasaun Baukau, Afonso dos Santos da Costa esplika, programa merenda eskolar importante ba estudante benefisiariu sira, iha neebe nia objetivu atu fo han estudante sira iha tempu prosesu aprendizajen hodi ativu iha aula, tanba nee kontinua monitoriza hodi fo han estudante sira ho hahan nutritivu.
“Presiza ema hotu hotu nia kolaborasaun para bele oferese hahan nutrisaun ida diak ba ita nia oan sira, liu liu mak EJP, fornesedor, diretiva eskola, mestri no mestra sira nia apoiu para implementa merenda eskolar nee diak,” hateten Afonso ba STL iha Vila Nova Baukau, Kinta (18/09/2025).
Nia sublina, atu fo han estudante sira ho hahan nutritivu liu husi programa merenda eskolar, Edukasaun Baukau kontinua koordena ho parte Ekipa Jestaun Programa, Kozineira, Diretores eskolar no Profesores sira atu mantein tein tuir menu neebe indika ona iha mata dalan merenda eskolar.
Nunee Servisu Edukasaun Baukau mos kontinua planu no koordena inan aman estudante sira, atu oferese produtu lokal ba Ekipa Jestaun Programa hodi sosa no tein ba estudante sira han, tanba produtu lokal mak nakonu ho proteina.
Nia dehan, polimika implementa merenda eskolar iha eskola Ensinu Baziku Filial Uaimanuboe Suku Uailili, Postu Baukau Vila rezolve ona hafoin ekipa remata halo monitorizasaun.
“Uaimanuboe rezolve ona, ami ho ekipa ba haree informasaun sira neebe iha maibe nee hanesan dezentendimentu sira nia maibe hakarak dada malu sai iha publiku,” Afonso informa.
Kona-ba informasaun sira hanesan parte koordenador eskola foti osan programa merenda eskolar no kozineira lori etu restu ba uma neebe foka sai iha publiku nee laloos, tanba sira iha problema seluk nunee aproveita situasaun hodi insulta malu iha publiku.
Jornalista: Tomas Reis
Editora: Domingas Gomes
