BAUKAU, STLTIMORLESTE.com – Servisu Munisipal Edukasaun Baukau husu Komando Polisia Munisipiu Baukau trava estudante finalista sira, bainhira halao konvoi ho motorizada iha sidade Baukau.
Diretor Servisu Munisipal Edukasaun Baukau, Afonso dos Santos da Costa informa, iha loron 18 Dezembru 2025 (aban) eskola ensinu baziku, sekundariu no tekniku vokasional iha Munisipiu Baukau sei halo distribuisaun rezultadu ezame nasional anu letivu 2025 nian ba estudante sira iha nivel eskola no husu parte seguransa atu atensaun ba estudante finaliza sira bainhira remata rona rezultadu halo konvoi ho motor.
“Seguransa ita iha ona koordenasaun, tanba kontente husi nivel ida ba nivel ida laos ho pawai, maibe halo kontente ho kolega sira han hemu ga konversa laos ho buat hirak nee,” Afonso hateten ba STL.iha knaar fatin Vila Nova, Baukau, Kuarta (17/12/2025).
Nia katak, husi distribuisaun rezultadu ezama Nasional sira liu ba estudante sira konvoi ho motor iha estrada publiku no konsidera asaun refere nuudar identidade ba estudante finalista sira, maibe tuir loloos konvoi labele akontese, tanba iha impaktu balu, maibe bainhira estudante sira kontente ho rezultadu husi nivel ensinu baziku nonu anu ba Sekundaria no husi Sekundaria ba Universidade no seluk tan bele selebra, maibe selebra ho meius seluk neebe laiha risku.
Tanba nee Servisu Munisipal Edukasaun Baukau koordena ona Komando Polisia Munisipiu Baukau atu asegura distribuisaun rezultadu ezame iha loron 18 Dezembru 2025.
Liga ho asuntu nee STL tenta konfirma Komando Polisia Munisipiu Baukau, maibe Komadante Polisia Munisipiu Baukau, lakohi fo komentariu.
Jornalista: Tomas Reis
Editora: Carme Ximenes
