BAUKAU, STLTIMORLESTE.com – Servisu Edukasaun Munisipiu Baukau hahu planu atu identifika komunidade sira neebe okupa areadores eskola nian hodi relata ba Ministeiru Edukasaun.
Diretor Servisu Edukasaun Munisipiu Baukau, Afonso dos Santos da Costa esplika, estrutura anterior iha Servisu Edukasaun Munisipal antes nee halo ona identifikasaun ba komunidade sira hela iha area eskola nian, maibe la konsege finaliza, tanba nee sei kontinua hodi halo identifikasaun.
“Ita identifika sira neebe hela iha areador eskola sira nee, ita fo informasaun no koordena barak lao diak ba ita nia oan sira,” hateten Afonso ba STL iha Vila Nova Baukau, Kuarta (14/05/2025)
Diretor nee informa, areadores eskola sira iha Munisipiu Baukau neebe komunidade balun okupa mak hanesan iha Eskola Ensinu Baziku Primeiru-Segundu no Terseiru Siklu Buruma, Ensinu Baziku Terseiru Siklu Tirilolo no seluk tan.
Nia argumentu, mezmu husi komunidade okupa areador eskola durante nee la prezudika ba prosesu aprendizajen, maibe too tempu sei muda bainhira Ministeriu Edukasaun fo ona orientasaun.
“Karik Nasional iha ona informasaun no despaisu ruma mai ona ita identifika para muda, Estadu bele planu ba estrutura eskola para ita nia oan sira aprende ho diak,” Afonso akresenta.
Nia fundamenta, planu halo identifikasaun ba komunidade okupa areador eskola nian, Servisu Edukasaun Munisipal sei hein despaisu no orientesaun husi Ministeriu hafoin ekipa Munisipal ezekuta no relata dadus ba Nasional hafoin implementa planu.
Tanba nee husu komunidade sira neebe daudaun okupa areador eskola nian atu koopera bainhira ekipa ezekuta servisu halo identifikasaun.
(tom)
