BAUKAU, STLTIMORLESTE.com – Servisu Munisipal Edukasaun Baukau husu profesores sira fo pasa ba estudante sira neebe tuir ezame terseiru periodu anu letivu 2025, tenke haree husi estudante sira nia kualidade estudu.
Diretor Servisu Munisipal Edukasaun Baukau, Afonso dos Santos da Costa informa, ezame terseiru periodu anu letivu 2025 sei realiza iha loron 17 Novembru nee, neebe iha Munisipiu Baukau total estudante husi eskola ensinu baziku rihun 28.355, kompostu primeiru segundu siklu kobre primiru anu too sestu anu no ensinu baziku terseiru siklu setimu anu no oitavu anu.
“Servisu Munisipal informa no rekomenda ba iha diretiva eskola no profesores sira, ezame terseiru periodu nee avaliasaun ba prosesu aprendizajem durante tinan ida nian, tanba nee husu diretiva eskola akompanha didiak ba ezame nee,” hateten Afonso ba STL iha knaar fatin Vila Nova, Baukau, Kinta (06/11/2025).
Nia sublina, orientasaun husi Edukasaun too ona iha nivel eskola sira halo preparasaun ba ezame terseiru periodu neebe sei realiza iha fulan nee, nunee husu profesores sira akompanha estudante sira iha ezame refere no fo pasa, ba estudante ida tenke haree estudante sira nia ativu iha prosesu aprendizajem no hatene lee no hakerek komprende materia neebe iha.
Bainhira haree estudante ida la ativu iha sala durante prosesu aprendizajem no la hatene lee no hakerek, labele fo pasa, tanba la iha kualidade estudu, maibe halakon nunee estudante refere esforsu aan iha anu letivu tiur mai, tanba profesores mak estudante sira nia inan aman iha direitu avalia kada estudante ida nia kualidade estudu.
“Estudante sira nee ita hotu nia familia koalia kona-ba oan inan aman entrega tiha ona ba ita, ita mak sai nia inan aman, laiha ema ida rua mak ita nia familia ita nia oan, mais estudante hotu-hotu ita nia oan ita tenke haree didiak nia pasa tenke ho nia kriteriu sira, se nia hatene ita fo pasa nia se nia la hatene ita dehan nia la hatene, ita fo avaliasaun hanesan nia inan aman para prepara oan sira nia futuru neebe diak,” Afonso akresenta.
Diretor nee argumentu, razaun husu profesores sira haree estudante sira nia kualidade estudu hafoin bele fo pasa, tanba Timor-Leste kontinua loke liras adere ba organizasaun no asosiasaun internasional sira hanesan ASEAN no seluk tan, nunee edukasaun mak save importante liu husi profesores sira prepara rekursu umanu kualidade hodi kompete iha futuru mai.
Iha sorin seluk, Adjuntu Diretor Eskola Ensinu Baziku Terseiru Siklu Sentral Tirilolo Baukau, Lucas Freitas Belo hateten, durante prosesu aprendizajem lao husi inisiu parte eskola koko ona kada estudante nia kapasidade, liu husi ezame diaria nuudar sasukat ida ba profesores atu priense valor iha kaderneta estudante.
“Agora dadauk atu tama terseiru periodu nee ami iha faze preparasaun pontus atu bele fo ezame iha loron 17 fulan Novembru, iha neeba mak ita foin haree estudante nia kualidade nee liu husi ezame bele pasa ga labele pasa, tanba iha neeba iha estandar hatudu estudante nee pasa la pasa,” Lucas katak.
Adjuntu Diretor nee informa, tuir estandar husi Ministeriu Edukasaun valor ba estudante ida atu pasa 60, tanba nee parte eskola sei mantein ho valor estandar husi Ministeriu Edukasaun nunee estudante sira iha kualidade tuir orientasaun husi Ministeriu.
Jornalista: Tomas Reis
Editora: Carme Ximenes
