DILI, STLTIMORLESTE.com – Servisu Edukasaun Munisipiu Likisa nafatin simu pedidu mai husi eskola hirak neebe husu atu aumenta sala aprendizajen ba estudantes sira.
“Ita nian eskola balun iha Munisípiu Likisa nee atu aumenta sala aprendizajen ba estudantes sira, maibe ita seidauk iha dadus jeral katak atu aumenta sala nee hira, tanba kondisaun eskola nee husi tinan ida ba tinan ida nee sempre iha mudansa, tanba sira seidauk hatoo mai numeru estudantes nee hira, nee ita tenke iha planu para bele aumenta sala,” dehan Diretor Servisu Edukasaun Munisípiu Likisa, Julio da Silva ba jornalista STL liu husi telefone, Tersa nee (06/01/2026).
Nia akresenta, tanba nee kuaze sala de aula hira mak presiza atu aumenta, nee husi ME iha ona planu, tanba nee presiza prepara dadus nee ho diak, tanba nee Edukasaun Likisa presiza simu pedidu husi eskola atu aumenta sala hira, nunee hatoo fali ba iha ME Nasional.
“Nee duni ita presiza simu pedidu husi eskola kona-ba dadus estudantes nee nain hira, atu nunee ita bele hatene ona katak, atu aumenta sala de aula nee hira, ho nunee ita bele relata fali ba iha nasional,” tenik nia.
Nunee mos Diretor Servisu Edukasaun Munisípiu Manatuto, Patricio da Cruz Quintao hatete, inspetor sira nafatin halo monitoring ba eskola sira no eskola balun neebe presiza halo reabilitasaun para bele aumenta sala aprendizajen ba estudantes sira.
“Ita nian ispetor sira nafatin halo monitoring ba eskola sira no eskola balun neebe presiza halo reabilitasaun para bele aumenta sala aprendizajen ba estudantes sira,” dehan nia.
Jornalista: Jacinta Sequeira
