BAUKAU, STLTIMORLESTE.com – Servisu Munisipal Edukasaun Baukau sei buka hatene motivu husi labarik nain 60 resin iha area Darenafa, Suku Namanei, Postu Administrativu Kelikai Antigu, neebe la eskola.
Diretor Servisu Munisipal Edukasaun Baukau, Afonso dos Santos da Costa senti triste bainhira akompanha informasaun kona-ba labarik nain 60 resin husi Aldeia rua hanesan Sirilaku no Loirae Suku Namanei labarik sira la eskola, tanba razaun kondisaun ekonomia familia, nunee sei halo identifikasaun iha tempu badak hodi hatene motivu kona-ba labarik hirak neebe daudaun la eskola.
“Kona-ba Namanei depois ita identifika tanba labarik 60 kedas nia kauza saida mak iha deit liur, tanba ekonomia ga falta finanseiru husi familia ga oinsa ita sei identifika, tanba barak nee presiza Estadu nia tulun,” hateten Afonso ba STL, iha knaar fatin Vila Antiga, Buakau, Segunda (08/09/2025).
Diretor nee dehan, daudaun nee Servisu Edukasaun Munisipal planeia ona no tempu badak liu husi ekipa ida ba halo identifikasaun hodi hatene motivu lo-loos, tanba numeru labarik nain 60 resin lakon direiru ba asesu edukasaun.
Nunee iha faze primeiru sira halo identifikasaun neebe ekipa husi Ministeriu Edukasaun, maibe bainhira identifikasaun remata sei relata ba dadus ba linhas ministerial hotu hodi tetu, tanba numeru labarik barak.
“Ba Edukasaun ami triste boot, tanba ita nia oan sira barak, agora ita nia Estadu esforsu para ema hotu-hotu labele husik ema ida iha kotuk, hotu-hotu asesu edukasaun se sira nia tinan, tinan aprende nian sira halimar iha liur nee ita triste,” Afonso argumentu.
Hanesan Diretor Servisu Munisipal Edukasaun Baukau, Afonso preokupa ho labarik nain 60 resin no seluk tan lakon ba asesu edukasaun nee fo impaktu ba Estadu Timor-Leste, tanba labarik sira mak jerasaun futuru ba masaun ida nee.
Entretantu identifikasaun nee tuir planu, Servisu Edukasaun Edukasaun Baukau sei halao iha semana nee.
Jornalista: Tomas Reis
Editora:Carme Ximenes
