BAUKAU, STLTIMORLESTE.com – Servisu Munisipal Edukasaun Baukau sei investiga prosesu implementasaun programa merenda eskolar iha Eskola Ensinu Baziku Filial Katolika Uaimanuboe, Suku Uailili, Postu Administrativu Baukau Vila, neebe daudaun mosu polemika.
Diretor Servisu Munisipal Edukasaun Baukau, Afonso dos Santos da Costa esplika, relasiona ho deklarasaun koordenador eskola Uaimanuboe nian hateten, kozineira lori etu restu husi merenda eskolar nian lori ba uma nee, tuir lo-loos kozineira labele lori etu restu ba uma, tanba mata dalan merenda eskolar la autoriza, maibe bainhira estudante sira han la hotu iha bikan laran no etu mutuk kozineira bele lori ba uma.
“Lo-loos nee labele fo lisensa atu lori etu restu, maibe tanba iha ona restu hakarak ka lakohi lori, tanba nee nia restu, mais labele loro-loron restu hela deit nee problema, tanba nee ekipa sei fo hanoin ba sira,” hateten Afonso ba STL iha Tirilolo Baukau, Sabado (23/08/2025).
Nia sublina, kona-ba deklarasaun kozineira nian katak, tanba deit la suru etu ba profesores sira mak Koordenador eskola duun kozineira lori etu restu ba uma, Edukasaun sei halo investigasaun hodi hatene motivu, tanba programa merenda eskolar profesores laiha direitu atu asesu.
Enkuantu kona-ba etu diak nian kozinha la iha direitu atu lori ba uma, maibe tenke fahe hotu ba estudante sira hodi han no prezisa mos kozinha halo observasaun uluk ba estudante sira iha sala laran hafoin sukat foos hodi tein tuir kilograma neebe difinidu, nunee labele iha etu restu loron-loron.
“Se beibeik ona ita prezisa hasoru ekipa nee para klarifika, inspesaun labele restu hela deit. Etu mutuk bele naran katak, labele ho razaun tein barak depois lori fila fali ba uma nee buat ketak ida, maibe nia restu hanesan mutuk nee buat ketak, han la hotu iha bikan nee lori ba uma,” tenik Afonso.
Diretor Edukasaun Baukau nee katak, kuandu situasaun sira nee akontese dehan kozineira lori etu restu ba uma, nee problema internal neebe tuir lo-loos Koordenador eskola iha kompetensia atu rezolve, maibe kuandu fo sai ba publiku nee deskomfia iha diskuidu ruma.
Nunee tempu besik Servisu Edukasaun Munisipiu Baukau sei ba direita iha eskola refere hodi hatene motivu ba asuntu nee, tanba durante nee Edukasaun sosializa ona lalaok merenda eskolar ba Ekipa Jestaun Programa no responsavel eskola sira no merese situasaun nee atu akontese.
(tom)
