BAUKAU, STLTIMORLESTE.com – Servisu Munisipal Edukasaun Baukau sei konfirma eskola publiku sira neebe kada fulan simu osan husi estudante sira.
Diretor Servisu Munisipal Edukasaun Baukau, Afonso dos Santos da Costa hateten, eskola publiku sira neebe gratuitu mak eskola ensinu baziku kompostu husi primeiru segundu no terseiru siklu, maibe Pre-Eskolar sira no eskola publiku sekundaria jeral no tekniku vokasional la obriga atu eskola gratuitu, tanba sirkular iha atu estudante sira kontribui osan, maibe depende ba planu eskola.
Nunee kona-ba Eskola Sekundaria Jeral 01 Tirilolo Baukau neebe iha anu letivu 2025 simu US$ 2.00 husi estudante sira, parte Edukasaun Munisipal sei konfirma hodi hatene nia motivu.
“Ami konfirma tiha lai depois mak haree sira nia kontribuisaun US$ 2.00 nia problema oinsa karik, konfirma mak hatene,” Afonso hateten ba jornalista STL iha knaar fatin Vila Nova Baukau, Tersa (02/12/2025).
Nia sublina, bainhira konfirma mak eskola simu osan US$ 2.00 kada fulan husi estudante, tanba razaun profesores la sufisiente nunee husi kontribuisaun estudante nian selu ba profesores voluntariu sira, maibe nee sei akontese deit iha anu letivu 2025, tanba iha anu letivu 2026 eskola refere sei hetan profesores kolokasaun husi Ministeriu Edukasaun, tanba daudaun iha ona faze kolokasaun profesores.
Nunee bainhira profesores kolokasaun husi Ministeriu Edukasaun too ona iha eskola, parte Edukasaun Munisipal sei koordena Eskola Sekundaria Jeral 01 Tirilolo Baukau hodi hapara profesores voluntariu sira.
“Tuir lei nee ida neebe obrigatoriu gratuitu mak ensinu baziku nee, agora ida eskola sira seluk hanesan Pre-Eskolar, Sekundaria Tekniku Vokasional nee buat ketak ida, lei la kestiona, Terseiru Siklu mos labele selu, tanba nee ensinu baziku,” Afonso akresenta.
Maibe tuir informasaun husi Komunidade, Venancio Jorge de Sá katak, nia oan ida eskola iha Eskola Ensinu Baziku Terseiru Siklu Kaibada Uaimua kada fulan selu US$ 3.00 ba eskola, tanba nee Edukasaun Baukau sei halo konfirmasaun ho eskola refere iha tempu besik hodi hatene motivu, tanba lei edukasaun la permite atu eskola Ensinu Baziku sira simu osan husi estudante.
“Nee depois mak ami konfirma, tanba ami seidauk hetan informasaun, maibe se hanesan nee lei mos sira kontra,” nia hakotu.
Jornalista: Tomas Reis
Editor: Xisto Mendonça
