BAUKAU, STLTIMORLESTE.com – Autoridade Munisipiu Baukau selebra loron mundial Ema ho Defisiensia (EhD) iha Baukau.
EhD husi Fundasaun Uma Pas Baukau, Venancio Soares Belo espresa sentimentu kontente no agradese ba Autoridade Munisipiu Baukau, tanba bele selebra loron mundial EhD dala 2 iha Baukau, neebe iha tinan 2025 ho tema “Haburas Sosiedade Sira Neebe Inkluzivu ba Defisiensia Hodi Avansa Progresu Sosial”.
“Ida nee husi munisipiu organiza ba dala rua, maibe ba nivel nasional dala barak ona, ita haree ba atendimentu ba Ema ho Defisiensia iha Baukau uluk mak susar, maibe agora diak ona, tanba autoridade sira hatene ona asuntu defisiensia nian,” Venancio hateten ba jornalista STL hafoin partisipa selebra loron mundial EhD iha salaun apuramentu Vila Nova Baukau, Tersa (02/12/2025).
Venancio apresia politika Autoridade Munisipiu Baukau, tanba iha periodu hirak liu ba, iha reuniaun Konselhu Kordenasaun Munisipal no Konselhu Konsultivu Munisipal EhD hetan barreira, tanba la partisipa iha reuniaun refere, maibe iha periodu nee EhD hetan espasu, tanba partisipa ona iha reuniaun refere hodi kontribui opiniões ba planu prioridade Munisipiu nian.
Maine iha parte seluk EhD mos nafatin hetan barreira iha periodu nee, tanba iha Servisu Administrasaun Autoridade Munisipal Baukau seidauk involve EhD iha diresaun servisu sira.
“Entuan husi sesaun ida nee planu munisipiu nian ba oin planu poder lokal desentralizasaun ba ita nia munisipiu karik, papel autoridade nian konsidera Ema ho Defisiensia sira involve iha parte neeba,” Venancio komenta.
Tuir nia katak, iha selebrasaun loron mundial EhD nee bele motiva autoridade kompete sira iha Munisipiu Baukau hodi involve EhD sira iha Servisu Munisipal nian, tanba EhD iha kapasidade kona-ba servisu saude nian, administrasaun no seluk tan, maibe la hetan oportunidade atu sai funsionariu iha Servisu Munisipal nian.
Nia argumentu, vaga sira neebe Autoridade Munisipiu loke ba publiku EhD iha vontade atu kompete, maibe kondisaun la permite, tanba Edifisiu Servisu Munisipal sira maioria seidauk iha asesibilidade ba EhD.
“Ami nia esperensa iha selebrasaun ida nee mak kona-ba infraestrutura prezisa inkluzivu no edifisiu hotu-hotu,” nia espresa
Iha fatin hanesan, maluk defisiensia Ediziana Eliza Belo agradese no apresia ba planu Autoridade Munisipiu Baukau, tanba selebra ona loron EhD iha Baukau, maibe triste tanba iha Administrasaun Publiku sira iha Baukau nia atendementu ba EhD seidauk masimu.
“Razaun ida mak fatin neebe atu uza ladun iha asesibilidade nomos sira seidauk inklui ami defisiensia sira iha Servisu Administrasaun nian, maibe seidauk masimu liu,” Ediziana katak
Nia iha esperansa ba selebrasaun loron mundial Ema ho Defisiensia, tanba liu husi selebrasaun refere bele motiva Governu atu fo oportunidade ba Ema ho Defisiensia sira atu hola parte iha Servisu Administrasaun Munisipal nian, tanba maioria iha kapasidade maibe hetan limitasaun, tanba la hetan oportunidade.
“Ami Ema ho Defisiensia husu ba Governu fo mai ami oportunidade, laos karidade, tanba buat neebe ami bele halo, buat neebe ami labele halo ami labele,” Nia espresa.
Entretantu selebrasaun loron Mundial EhD realiza iha salaun apuramentu Vila Nova Baukau, hetan partisipasaun masimu husi Ema ho Defisiensia sira.
Jornalista: Tomas Reis
Editor: Xisto Mendonça
