BAUKAU, STLTIMORLESTE.com – Ema ho Defisiensia (EhD) barak iha Munisipiu Baukau la hetan oportunidade ba partisipa selebrasaun loron mundial Ema ho Defisiensia (EhD) neebe selebra iha loron 03 Dezembru tinan nee.
Tuir informasaun neebe STL asesu, bazeia ba kalendariu nasional loron 03 Dezembru aniversariu EhD sira nian iha mundu, inklui iha Timor Leste atu sidadaun EhD hamutuk 17.061 kompostu feto 8.517 no mane 8.544. Neebe EhD ain hamutuk 3.853, difisiensia kognisaun rihun 2.9, tilun rihun 3.6, matan rihun 3.3, ibun rihun 2.8 inklui defisiensia autokuidadu rihun 2.4 atu selebra loron refere iha kada Munisipiu, neebe Baukau rasik iha EhD hamutuk 5.316 hein selebrasaun refere.
Sidadaun EhD iha Baukau entuziasmu tebes atu komemora, tanba tuir tema mundial tinan nee “haforsa lideransa EhD ba futuru neebe inkluzivu no sustentavel” no tema nasional ” empodera EhD liu husi implementasaun planu asaun nasional ba EhD periodu 2021-2030 hodi atinji dezenvolvimentu ida neebe Inkluzivu no sustentavel iha TL, maibe partisipasaun menus tebes.
“Selebra nee mak atu halibur Ema ho Difisiensia sira atu sente katak ida nee mak loron ba sira bele sente kontente, maibe politika loron mundial nee kada Postu ema nain 10, ida nee sente nafatin husik ita nia maluk iha kotuk, seidauk kompleta iha partisipasaun,” hateten EhD Tomas Martins Gusmão ba STL iha Vila Antiga, Kuarta (04/12/2024).
Nia sublina, EhD neebe iha Munisipiu Baukau barak, maibe politika parte relevante sira desidi hodi hili EhD sira iha Postu Administrativu 6, no kada Postu 1 reprezentante EhD nain 10 hodi partisipa iha komemorasaun refere.
Nia fundamenta, desizaun hili EhD nain 10 husi Postu Administrativu 1 hodi sai reprezentante nee, la fo oportunidade hanesan ba EhD hotu, tanba partisipasaun EhD la masimu iha loron refere, neebe tuir lo-loos partisipasaun tenke masimu, tanba loron importante ba EhD sira hotu.
Hatan ba kestaun nee Prezidente Komisaun Organizadora ba eventu refere atual Diretor Sentru Solidaredade Sosial Munisipiu Baukau Clementino Sarmento rekonese, numeru EhD iha Munisipiu Baukau liu rihun 5, maibe total partisipa iha eventu refere la too nain 90, tanba laiha orsamentu atu prepara ba EhD rihun 5 hodi partisipa iha eventu refere.
Nunee parte Komisaun Organizadora Munisipal prepara deit ba ema nain 80 hodi haree akomodasaun sira.
“Sira neebe la partisipa la signifika ita haluha sira, maibe iha seremonia seluk ida neebe mak ona sira sei troka malu, neebe ita sei la husik ema ida iha kotuk,” nia argumenta.
Clementino deklara, orsamentu neebe aloka ba eventu refere preve husi Ministeriu Soliedariedade Sosial no Inkluzaun hamutuk rihun US$ 8 resin hodi aloka ba seksaun 13 neebe priense atividade iha selebrasaun refere.
(EST 2)
