DILI, STLTIMORLESTE.com – Deputada Republika Indonezia (RI), Julie Laiskodat hatete, Ema ho Defisiensia (EhD) iha direitu hanesan ho ema baibain no iha Maromak nia oin hanesan, tanba nee labele halo diskriminasaun ba sira.
Deputada Republika Indonezia Julie Laiskodat hatoo lia hirak nee ba jornalista sira bainhira remata vizita labarik sira iha konventu Madre Alma Bebonuk, Segunda (25/11/2025).
Nia hatete, labarik sira neebe ho kondisaun defisiensia ho ema baibain iha diretu neebe hanesan, tanba nee labele halo diskriminasaun ba sira.
“Ema hotu neebe iha mundu nee kriatura husi Maromak nia deit hanesan iha Maromak nia oin hanesan mos labarik sira neebe mak ho kondisaun ema ho defisiensia iha direitu atu moris iha rai ida, maske sira menus parte balun maibe sira mos kelebihan parte balun,” katak deputada RI nee.
Iha biban nee nia iha esperansa ho labarik sira iha Konvento Alma nee, maske fizikamente la kompletu maibe sira iha hanoin no kapasidade hanesan mos ho labarik neebe laos ho defisiensia.
“Hanesan labarik Sinta neebe hela iha Konventu Madre Alma idade 22 bainhira remata nia estudu iha Sekundaria, iha tinan oin hanesan ohin hau husu futuru hakarak sai saida, no nia resposta katak hakarak sai emprezaria. Ida nee hau hanoin neebe diak, tanba ema neebe ho kondisaun kompletu, maibe seidauk hanoin atu sai emprezarial, no hau hatene TL mos iha potensial ba negosiu nia, maibe oinsa sai fali ba ekonomia Timor, entaun liu husi bisnis,” katak nia.
Nia hatutan, nia mos iha belun diak ida iha Kalibata Jakarta, Eskola IPMI internasional Scool bisnis, no nia mos haruka ona labarik barak husi NTT ba eskola iha IPMI, no bainhira labarik neebe hela iha konventu remata estudu sekundaria bele ba halao estudu iha Kalibata.
Nunee mos Estudante husi Kongregasaun Madre Alma, Isabel do Santos naran bolu Sinta hatete, nia sente kontente bainhira rona Deputada husi Republika Indonezia neebe mak hakarak apoiu nia hodi ba eskola iha Indonezia.
“Prmeiru ves hau rona ida nee, hau sente kontente tebes bainhira rona liafuan ida nee husi Deputada Republika Indonezia,” katak nia.
Nia hatutan, nia sei estuda makaas nunee mehi sira neebe mak nia iha bele realiza iha futuru, no mehi neebe mak iha hakarak sai emprezariu.
(eme)
