DILI, STLTIMORLESTE.com – Relasiona ho loron 14 Fevereiru Valentine’s Day, aproveita komemora loron ida nee eis Estudantes Sejawa-Bali mos halao atividade doasaun raan ba Banco de Sangue, tanba liu husi raan turuk ida bele salva pasiente nia vida.
“Ami aproveita komemora loron ida nee fahe ami nia domin liu husi fo ami nia raan ba ema neebe presiza,” hatete Eis Estudantes Sejawa- Bali, Jo Britis dos Santos ba jornalista sira iha Banco de Sangue HNGV, Sabadu (14/02/2026).
Nia esplika, Eis Estudantes Sejawa-Bali hamutuk 30 pesoas neebe halo ona doasaun raan hodi ajuda pasiente sira nee presiza raan.
“Ami uluk estuda hotu iha Jawa balun iha Bali, entaun ami iha inisiativa halo ida nee, ami reprezenta grupu Sejawa-Bali, tanba nee ami halo doasaun raan nee dala rua ona, tinan kotuk ami halao iha Igreja Bekora nomos agora halo tan iha nee ba dala tolu,” nia informa.
Nia deklara, objetivu prinsipal Eis Estudantes Sejawa-Bali hamutuk hodi halo doasaun raan nee atu ajuda pasiente balun neebe moras dengue nomos inan isin rua sira neebe presiza raan inklui mos pasiente sira seluk neebe presiza tebes raan.
“Ita espera katak, ami nia atividade ida nee bele hafanu ita nia komunidade iha vontade para mai ajuda hasai raan, hodi aumenta stok raan iha Banco de Sangue, nunee ajuda ema neebe periza, tanba raan turuk ida bele salva ema nia vida,” nia koalia.
Iha fatin hanesan, Xefe Departamentu Banco de Sangue, Alexandrino Mendonça informa, Banco de Sangue agradese tebes ba Eis Estudantes Sejawa-Bali neebe mai doasaun raan volontariu, ida nee hanesan atividade umanidade ida hatoo sira nia domin ba pasiente sira neebe baixa iha Hospital Nasional Giudo Valadares (HNGV) no balun neebe presiza raan.
“Total nee hamutuk 50, maibe ohin ita halo ona doasaun raan 25 no balun hodi kalan la deskansa nomos balun servisu, maibe ita agradese tebes tanba Eis Estudantes Sejawa-Bali bele mai ona Banco de Sangue hodi hasai raan, tanba raan turuk ida bele salva ema nia vida,” nia afirma.
(jen)
