DILI, STLTIMORLESTE.com – Eis Profesor Kontratadu husi tinan 2023 hasoru malu ho Komisaun G neebe trata asuntu Edukasaun Juventude Kultura nomos Sidadania iha Parlamentu Nasional (PN), hodi hatoo sira nia preokupasaun kona-ba membru Polisia Nasional Timor Leste (PNTL) neebe bandu sira atu halo manifestasaun no dada spanduk iha Palasiu Governu oin.
Prezidente Komisaun G neebe trata asuntu Edukasaun Juventude Kultura nomos Sidadania, Deputadu Armando Lopes katak, eis profesor kontratadu sira mai hasoru Komisaun G hodi aprezenta sira nia preokupasaun kona-ba membru PNTL neebe bandu sira atu halo manifestasaun iha Palasiu Governu oin.
“Sira mai hatoo sira nia preokupasaun kona-ba durante nee sira halo manifestasaun, maibe polisia sira impede sira, tanba ida nee hau hatete ba sira katak, iha ita nia nasaun nee kuandu halo manifestasaun ruma nee tuir regras,” hatete Deputadu Armando Lopes ba jornalista sira iha resintu Parlamentu Nasional, Sesta (28/03/2025).
Nia akresenta, iha regras manifestasaun neebe iha hatete katak, hakarak halo manifestasaun mak tenke distansia 100 metru husi fatin sira neebe hakarak hatoo aspirasaun.
Tuir nia, eis profesor sira iha direitu atu halo manifestasaun no loke spanduk sira, maibe tenke kumpri regras sira kona-ba manifestasaun nian.
“Se karik eis profesor sira nee mak hatoo sira nia aspirasaun dook husi fatin sira nee, polisia sira mos komprende kumpri regras sira nee, tantu ami deputadu sira mos atu halo asaun ruma tenke kumpri regras kona-ba 100 metrus nee,” tenik nia.
Iha fatin hanesan, eis profesor kontratadu, Paulo de Jesus Magno katak, objetivu husi audiensia ho Komisaun G atu hatoo sira nia preokupasaun kona-ba polisia la autoriza sira atu halo manifestasaun no dada spanduk iha Palasiu Governu oin.
Nia dehan, eis profesor kontratadu sira dada spanduk iha Palasiu Governu oin, tanba bazeia ba sira nia problema sira, tanba durante sira hatoo sira nia aspirasaun maibe governu la rona inklui seputadu sira iha Parlamentu Nasional.
“Tanba nee diak liu atu publiku hatene mak liu husi spanduk nee hodi hatudu ba publiku katak problema neebe profesor 2023 sira nian seidauk rezolve ida, wainhira ami hakilar seguransa sira ba impede tiha, sira la uza seguransa nia knaar ida dehan atu asegura manifestasaun nee,” dehan profesor kontratadu Paulo.
(alb)
