DILI, STLTIMORLESTE.com – Eis profesor kontratu 2023 rejeita vaga espesial no vaga jeral neebe mak fo sai ona husi Ministeriu Edukasaun (ME).
Haktuir eis profesor kontratu 2023, Paulo de Jesus Magno ba STL, Segunda nee (24/03/2025).
“Vaga neebe mak ME loke nee iha vaga ninia tipu vaga nee mak ida vaga espesial ida ba ami, ida jeral. Ami inprinsipiu se teste, ami ho prinsipiu ida kualker teste deit ami rejeita, tanba saida mak ami rejeita, tanba bazeia ba ami nian estatutu, ami funsionariu ajente, segundu iha estatutu profesores ninia hau la konsege dekor, neebe iha neeba dehan, ema neebe atu tama ingresu espesial nee iha pontu tolu presiza atu pasa, ida mak primeiru liu tenke kontratu atual ho governu atual nee, kontratu neebe mak kontinua hela, governu neebe iha, iha momentu neebe hapara ami nee iha 2023, iha momentu nee signifika katak, ema neebe mak kontratu hela ho governu iha 2023,” nia afirma.
Paulo dehan, pontu ida segundu kona-ba sira nian estatutu nee dehan katak, maizumenus minimu ema ho kursu bacharelatu ou liu husi ida nee, pontu terseiru nee mak iha avaliasaun dezempenhu, iha pontu tolu nee mak hatan halo ema hetan ingresu espesial, inprinsipiu rejeita teste nee, maibe iha sira nian konkordansia neebe mak sira halo audensia ho sira edukasaun nee sira dehan katak, sira prontu koopera, katak bele minimiza ka hamenus tiha problema nee bele tuir teste neebe mak espesial ba sira.
“Maibe ami iha proposta hanesan akordu ida, neebe ami halo hela ba ME, kuandu ami lakon karik, lori ami ba iha neebe, nee primeiru, segundu mak ami nian kolega sira ho diploma sekundariu neebe mak la hola parte iha teste nee, sira nee rasik atu lori ba iha neebe, iha buat rua nee mak halo ami rejeita teste nee, tantu teste espesial no teste jeral,” tenik nia.
(jac)
