DILI, STLTIMORLESTE.com – Eis profesores kontratu 2023 husu Ministeriu Edukasaun (ME) ho Komisaun Funsaun Publika (KFP) atu rezolve sira nian problema tuir lei, no ba oin sira sei halo manifestasaun.
“Hau nuudar porta voz, hau la tuir teste, tanba hau nian kolega eis profesores lisensiadu 38 Ministeriu Edukasaun elimina, neebe hau sei la tuir iha nee ba, la tuir teste, tanba ho razaun primeiru Sekretariu Estadu ho Ministra Edukasaun bosok ami, sira dehan teste nee la loke ba públiku, maibe realidade sira loke ba públiku, ema 1000 aplika vaga, segundu sira la konsidera ami nian estatutu nudar ajente administrasaun funsaun publika, sira la konsidera mos atividades servisu neebe tinan 10 too 20, aat liu tan mak sira dehan halakon teste espesial nee ba ema sira neebe lisensiatura deit, maibe sira halakon tan kolega 38, tanba nee mak ohin hau husu nee atu suspende, maibe sira kontinua, sira obriga polisia rasta ami nian kolega sira tama ba tuir teste, maibe kolega barak mak lakon,” dehan porta voz profesores kontratu 2023, Agostinho Pinto ba jornalista STL, Segunda nee (16/06/2025).
Agostinho dehan, sira neebe lakon nee Ministeriu Publika ho Komisaun Funsaun Publiku atu rezolve oinsa, tanba sira nian estatutu nee ajente administrasaun funsaun publika, nee duni aban ba oin nee sira sei kontinua luta too hetan solusaun, husu ba Prezidente Komisaun Funsaun Publika atu klarifika sira nian estatutu ajente nee ilegal ka legal, ohin sira tuir teste nee kuaze atus ida resin,.maibe nain tolu ka haat deit mak liu.
“Nee ita boot sira bele konfirma ho sira dehan teste espesiál nee mak ida nee, maibe ida nee segundu ho terseiru nian nee sira sei tuir teste ka lae, ida nee hau la hatene. Hau porta voz rasik la tuir teste, tanba hau nian maluk sira elimina, halo fali selesaun dokumentus, ami nee ajente tiha ona. Altura nee ba hau orienta ema hotu sira neebe lisensiadu, laos bacharelatu ba hatama hotu dokumentus atus hitu resin, maibe husi atus hitu resin nee sira elimina fali ami nian maluk lisensiadu hamutuk 38,” dehan nia.
Nia dehan, sira nian pozisaun ba oin mak nafatin husu ba Komisaun Funsaun Publika ho Ministeriu Edukasaun atu rezolve sira nian problema tuir lei, tanba nee ba oin sira sei halo manifestasaun makaas liu tan iha Komisaun Funsaun Publika para klarifika sira nian estatutu ajente nee ilegal ka legal.
Nunee mos Diretor Nasional Rekursu Umanu ME, João Amaral antes nee hatete, eis profesores kontratu hamutuk 725 sei halao teste iha loron 16 fulan ida nee, teste nee halao ba sira mesak deit la hamutuk ho aplikantes sira seluk, teste nee halao ba sira mesak deit.
“Dia 17 nee ita halo teste ba sira neebe momentu ita renunsia, selesaun dokumentus sira neebe mak ita fo 10 dias mai reklama nee mak ita fo teste ba sira iha loron 17, no dia 16 nee ba ita nian eis profesores kontratu 2023 ninia,” katak nia.
(jac)
