DILI, STLTIMORLESTE.com – Iha tinan kotuk Ekipa Jestor Programa (EJP) merenda eskolar 8 husi eskola sira Munisípiu Likisa submete ona relatóriu implementasaun merenda eskolar ba servisu Edukasaun Munisipiu Likisa.
Julio da Silva nuudar Diretor Servisu Edukasaun Munisípiu Likisa hatoo kestaun nee ba jornalista STL liu husi telefone, Kinta nee (08/01/2026).
“Hau hanoin hela EJP rua Darulete no Lakulolema mak seidauk hatama relatóriu,.restu finaliza ona sira nian relatóriu mai ami. Iha tinan kotuk ita nian EJP 8 husi eskola 8 mak hatama ona relatóriu mai ami, tanba tinan ida nee laiha ona grupu EJP, tanba bazeia ba dekretu governu nu. 3 nee halakon ona EJP,” nia dehan.
Julio dehan, merenda koalia EJP, EJP 8 neebe hatama ona sira nian relatóriu mai parte SEM Likisa nee hamutuk, la haree ba nivel sira tama hamutuk deit, sira hamutuk iha EJP tantu EPE ka EB, nee duni sira hamutuk deit.
Nunee mos Julio Sacadura nuudar Diretor Servisu Edukasaun Munisípiu Vikeke hatete, merenda eskolar seidauk lao tanba pakote orsamentu munisipiu seidauk tama, nunee programa refere seidauk lao iha eskola sira.
“Kona-ba relatóriu husi eskola hira mak hatama ona, nee ita konfirma ho Xefe Departementu Finansas no Fokal Poin Merenda Eskolar, tanba nia mak hatene liu kona-ba asuntu ida nee,” tenik nia.
Nunee mos Diretor Servisu Edukasaun Munisípiu Manatuto, Patricio da Cruz Quintao hatete, eskola balun too agora seidauk hatama relatóriu mai Edukasaun Munisípiu Manatuto, tanba nee husu direjente eskola idak-idak oinsa mak lori relatóriu ba implementasaun merenda eskolar nee submete mai iha Edukasaun Munisípal.
“Ita nian eskola balun too agora seidauk hatama relatóriu mai Edukasaun Munisípiu Manatuto, tanba nee husu direjente eskola idak-idak oinsa mak lori relatóriu ba implementasaun merenda eskolar nee submete mai iha Edukasaun Munisípal,” nia haktuir.
Reportajen: Jacinta Sequeira
