KELIKAI, STLTIMORLESTE.com – Ekipa Jestaun Programa (EJP) iha Eskola Katolika Filial Santa Terezinha Bualale, Postu Administrativu Kelikai, Munisipiu Baukau, viola direitu estudante iha implementasaun Programa Merenda Eskolar.
Koordenador eskola, Evangelino Freitas haktuir, konforme menu merenda eskolar neebe prepara husi EJP, kada semana estudante sira han modo naan karaun ho etu dala ida no manu tolun ho etu dala ida, enkuantu loron tolu seluk estudante sira han etu ho modo kanku no seluk tan.
“Loron seluk modo lakeru mutin no kanku, hau haree labarik sira fakar deit etu, tanba modo been mak ladun favorese ba sira. Manu tolun sorin deit, hudi singapura nee mos laos fuan tomak tesi tiha fahe ba rua,” hateten Evangelino ba STL iha Bualale, Sesta (21/03/2025)
Nia konta, kona-ba aifuan kada loron merenda nian, EJP liu husi kozinha sempre oferese aifuan hanesan hudi no apple laiha, maibe hudi neebe oferese fuan ida fahe rua hodi fo ba estudante nain rua, nunee mos manu tolun fuan ida ba estudante nain rua, tanba fahe mos ba rua.
Nia informa, naan neebe oferese husi fornesedor, naan karaun, maibe husi jeleira neebe tein ba estudante sira hodi haan iha kada loron Kuarta feira.
Nia sublina, kona-ba menu implementa merenda eskolar nian, parte eskola la hatene nia lalaok, tanba parte EJP mak prepara husi rezultadu treinanamentu neebe realiza iha nivel munisipiu, maibe la aprezenta ba eskola.
Enkuantu benefisiariu estudante Nolasco do Rego informa, modo neebe sira asesu husi merenda eskolar, loron Kuarta feira haan naan karau no loron Sesta feira haan modo manu tolun.
“Modo naan karau dala ida, manu tolun dala ida, hau sente triste, tanba lakon direitu iha merenda eskolar,” hateten Nolasco.
Estudante nee sente triste haree implementasaun Programa Merenda Eskolar iha Eskola Bualale, tanba informasaun seluk neebe asesu estudante sira iha eskola seluk han naan dala rua no manu tolun dala rua kada semana, maibe iha Eskola Katoliku Bualale haan naan dala ida no manu tolun dala ida, neebe manu tolu fuan ida fahe ba rua hafoin fo ba estudante sira.
Hatan ba kestaun nee, Diretor Servisu Edukasaun Munisipiu Baukau, Afonso dos Santos da Costa hatete, tuir mata dalan Programa Merenda Eskolar kada estudante han manu tolun fuan ida no manu tolun fuan ida la fera ba rua hodi fo ba estudante nain rua, nuune mos hanesan hudi.
“Nee ami sei fo hatene, tanba nee labarik nia direitu, estudante hetan manu tolun fuan ida, neebe nee tenke fo atensaun,” hateten Afonso.
Diretor Munisipal nee deklara, asaun fahe manu tolun fuan ida ba rua hodi fahe ba estudante iha merenda eskolar neebe akontese iha Eskola Katolika Filial Bualale, parte edukasaun liu husi inspetor eskola sei fo atensaun ba EJP, tanba nee viola direitu estudante.
Enkuantu kona-ba oferese naan karau no manu tolun semana ida dala ida, nee depende ba EJP mak deside, maibe kada semana estudante tenke haan naan ho manu tolun, tanba mata dalan mak orienta.
Entretantu estudante neebe benefisiariu ba programa merenda eskolar iha Eskola Katolika Filial Santa Terezinha Bualale hamutuk 65, kompostu sala neen (6) husi primeiru too sestu klase.
(tom)
