DILI, STLTIMORLESTE.com – Ekipa Jestor Programa (EJP) merenda eskolar iha Ensinu Baziku Sentral (EBC – sigla português) Fatumeta seidauk submete relatoriu ba Ministériu Edukasaun (ME), tanba nee estudantes husi EBF Fatumeta durante semana tolu asesu programa refere.
Lia hirak nee hatoo husi Koordenador EBF Fatumeta, José Manuel Pires ba jornalista STL iha nia knaar fatin Fatumeta, Kinta nee (24/06/2025).
“Kona-ba programa merenda eskolar nee, tanba ami nian fornesedór ho EJP nee seidauk submete relatoriu ba Ministériu Edukasaun, tanba nee ami seidauk iha merenda eskolar no daudaun nee sei paradu hela, tanba seidauk halo relatoriu hodi submete ba Ministeriu, tanba hahu iha loron hitu too agora ami nian estudantes sira la asesu ona merenda eskolar, tanba seidauk entrega relatoriu ba ME,” tenik nia.
José hatutan, durante semana rua agora tama ba iha semana tolu mak estudantes sira la asesu ba merenda eskolar, nee duni bele dehan sura hamutuk semana tolu merenda eskolar paradu too agora, fornesedór neebe tein ba estudantes sira nee nain lima, total estudantes iha eskola nee hamutuk 905.
Iha fatin seluk, Belchior Maria Almeida Barros hanesan Xefe Departamentu Programa Merenda Eskolar iha ME hatete, ME rekonhese programa merenda eskolar iha eskola sira Munisipiu Dili paradu.
“Los duni kuaze iha Munisipiu Dili merenda eskola paradu, tanba orsamentu Q2 nia hotu ona no hein hela prosesu Q3 nia seidauk sai, paradu hela tama fulan Agostu mak sei lao fali, munisipiu seluk seiduk iha informasaun, maibe eskola sira iha Munisipiu Dili nian nee merenda eskolar paradu hela. Koordenasaun hela ho Xefe Departamentu ba orsamentu programa merenda eskolar Munisipiu Dili ninia hatete katak, los duni iha fim de fulan junhu ninia ba Q2 ninia orsamentu hotu ona,”nia afirma.
Nia dehan, implementasaun Q3 nian ba Munisipiu Dili hetan ona aprovasaun hotu, agora ninia prosesu nee mak agora sei hein hela, husi parte finansas ninia halo transferensia orsamentu ba iha konta EJP sira nian, purtantu horiseik sira halo hela koordenasaun, husi esplikasaun neebe husi responsavel finansas Munisipiu Dili nian katak, se karik semana ida nee orsamentu tama, sira haree oinsa mak atu hein too fulan Agostu mak foin bele realiza.
(jac)
