DILI, STLTIMORLESTE.com – Ekipa Forsa Tarefa Konjunta neebe kompostu husi Polísia Nasionál Timor Leste (PNTL) no FALINTIL-Forsa Defeza Timor Leste (F-FDTL) remata ona nia servisu hodi fo segura hahu husi 28 Novembru too Natal no tinan foun nian.
Nia dehan, iha segunda (05/1) horiseik Komando PNTL no F-FDTL atualiza ona kestaun nee ba malu.
“Loos duni horiseik ita halo ona diskusaun ho senhor Komandante Falur Xefe Estadu Maiór Jenerál kona-ba ezistensia forsa tarefa konjunta ninian. Ita halo komunikasaun, ita hatene katak ohin nee remata. Agora ita prepara hela relatoriu, produs hela relatoriu para sira bele aprezenta mai iha Komandante Jeral no mós Xefe Estadu Maior Jenerál hodi ita kontinua ba iha Ministeriu Interiór no Ministeriu Defeza,” hatete Komandante Jerál Polisia Nasional Timor Leste (PNTL), Komisáriu Jerál Polísia Henrique da Costa ba jornalista sira iha nia knaar fatin Komando Jeral PNTL loron, Kuarta (07/01/2026).
Nia tenik, Komando Jerál PNTL bolu ona Komando operasaun sira tantu husi PNTL nomos forsa defeza nian atu fo orientasaun ba sira para nunee prepara relatóriu ruma depois mai halo aprezentasaun mai Komando hodi Komando kontinua ba iha mínisteriu relevante.
Nia deklara, semana oin sei realiza formatura jerál hodi ensera forsa tarefa koordena ninian servisu.
“Ohin nee iha hela faze orientasaun ninian para semana oin nee ita sei rona ka ita sei konvida ita boot sira mai partisipa serimonia parada konjunta hodi remata ninian”, nia koalia.
Komandante Jerál agradese no apresia ba servisu forsa tarefa konjunta, tanba hatudu servisu di’ak hodi hamutuk garante seguransa iha teritoriu nasionál hahu husi komemorasaun Proklasaun independénsia unilateral ba dala 50 iha 28 Novembru 2025 neebe lao diak inklui natál no tinan foun lao diak tebes.
“Ita agradese i apresia ba iha esforsu tomak neebe mak sira halo. Ita mós agradese ba Governu tanba iha inisiativa bele koloka forsa rua hamutuk hodi halo servisu koordena ba medida prevensaun sira. Ita akompanha hahú husi forma forsa tarefa sira koordenada, koordena nee ba iha 28 Novembru, laos iha 28 Novembru neebe halo iha kapital too iha munisípiu too suku aldeia sira no iha fatin area rurál”, nia Informa.
Nia hatutan, polísia dala ruma hamutuk ho kolega forsa sira halo kontrolu too iha munisípiu too mos fronteira.
“Sira nia servisu kapas tebes-tebes, neebe lori rezultadu diak ema hotu hakmatek. Mezmu mosu duni problema tuda malu, maibé joven sira kontente festeza tinan foun,” katak nia.
Nia argumenta, iha ambitu natal no tinan foun joven sira balun influensia ho alkól nunee provoka malu tuda malu, maibe nee la fo impaktu boot, tanba seguransa responde kedas.
Entretantu iha pajina Media F-FDTL nian iha Kuartel Jenerál loron 05 Janeiru tinan 2026, Komandante Jerál Polísia Nasionál Tmor Leste (PNTL) Komisariu Jerál Polísia Henrique da Costa enkontru ho Xefe Estadu Maior Jenerál FALINTIL-Forsa Defeza Timor Leste (F-FDTL), Tenente Jenerál Domingos Raúl Falur Rate Laek, enkontru dahuluk iha inisiu fulan Janeiru 2026, kontinua hametin kooperasaun hodi garante seguransa ba povu no Nasaun Timor Leste.
Iha inkontru nee koalia mos kona-ba preparasaun ba enseramentu forsa Tarefa konjunta PNTL ho F-FDTL iha semana ida nee nia laran mos.
Jornalista: Jeniche da Costa
