DILI, STLTIMORLESTE.com – Ekipa Feto Prontu Lidera (FPL) realiza workshop nasional bá revizaun dokumentu kuadru estratejiku kona-ba hakbiit partisipasaun feto iha eleisaun 2021 too 2025, nomos sei aprezenta susesu sira neebé feto sira atinji ona.
Diretora Fundasaun Caucus, Juleta da Silva dehan, ekipa FPL hanesan grupu trabalhu neebé iha inisiativa no estabelese husi Sekretariu Estadu Igualdade (SEI) iha 2021, ho objetivu empodera no haforsa kapasidade lideransa feto iha setor hotu.
Ekipa FPL nee kompostu husi organizasaun naun- govermental mak hanesan Caucus Feto Politika, Movimentu Feto Juventude Timor Leste (Moffe-TL), Patria, FMF, Bá Futuru no ACF.
Nia hatete, ekipa FPL hahu husi 2002 too 2024 hetan apoiu orsamentu husi SEI no agora sei kontinua nafatin.
Agora daudaun atividade ida nee lao, ekipa hetan apoiu husi Plan Internasional hodi suporta orsamentu bá atividade refere.
“Ami nia atividade nee kontinua lao nafatin. Ami mos hetan orsamentu husi Plan Internasional hodi apoiu ami nian atividade neebé halao daudaun,” dehan Juleta liu husi nia introdusaun badak kona-ba workshop nasional nee iha Delta Nova, Kuarta (28/05/2025).
Nia hatete, ekipa FPL nee hetan apoiu orsamentu husi parte SEI ho Plan Internasional.
Iha fatin hanesan Embaixador Plan Internasional, Cidalia Guteres Mouzinho hatete, programa ida nee Plan Internasional sempre apoiu hodi prepara lideransa feto sira, liu-liu bá juventude sira. Tanbà feto nia partisipasaun importante iha eleisaun hamutuk ho mane sira, tanbà feto mos presiza apoiu husi mane sira.
Tuir nia, durante nee feto partisipa hotu iha nasional no too munisipiu, maibe hakarak masimu liu tan iha eleisaun tuir mai. Labele koalia deit maibe tenke hatudu rezultadu.
“Plan Internasional sei suporta nafatin atividade sira nee liu husi workshop no sosializasaun sira neebé mak halao daudaun husi organizasaun sira nee, hakarak atu motiva no hasae kapasidade feto sira iha kbiit atu lidera,” dehan Cidalia.
Nia afirma, bainhira feto prontu atu lidera, tenke iha komitmentu bá asuntu feto nian, no feto sira tenke apoiu malu, bainhira iha feto balun kandidata aan iha eleisaun. Hanesan feto tenke apoiu maluk feto neebé kandidata aan.
“Dala ruma ita feto ho feto la apoiu malu. Ita nia feto maluk barani kandidata aan, maibe ita la apoiu no la hili nia iha eleisaun. Ida nee mak sai obstaklu, no pior liu tan mak hanesan parseiru mos la apoiu. Tanbà nee liu husi formasaun no sosializasaun neebé halao husi organizasaun sira bele fo konhesimentu ba feto sira,” nia tenik.
Nia hatutan, nunee husu mos bá partidu politiku sira tenke prepara feto sira iha partidu laran. Para nunee bainhira hetan konfiansa sai lideransa bele halao servisu ho responsabilidade hodi hetan rezultadu diak, tanbà rezultadu nee mak ema hotu hein.
Nunee mos Diretor Nasionál Dezenvolvimentu Igualidade Jeneru, Jose do Rosariu de Carvalho hatete, programa ekipa FPL nee parte SEI sempre apoiu no husu bá ekipa kontinua halo formasaun no hasae kapasitasaun bá feto sira. Bá partidu politiku sira tenke tau matan bá feto sira, kada bankada partidu politiku neebé hetan asentu iha Parlamentu Nasionál tenke asegura lei bá feto sira. Presiza hasae numeru feto iha lideransa nian. Bá atividade asuntu feto nian, SEI ho Plan nafatin suporta feto sira.
“Buat neebé sai obstaklu bá feto sira mak atu partisipa iha lideransa mak kultura. Tanbà iha Munisipiu balun, Mane la autoriza feto atu partisipa iha lideransa, maibe asosiasaun feto nafatin hamriik hodi luta ba partisipasaun lideransa, liu husi formasaun sira hanesan nee. Ho ida nee SEI nafatin suporta,” dehan nia.
Nia hatutan, bainhira feto prontu lidera, labele koalia deit iha ibun maibe tenke tau metin komitmentu iha asuntu feto nian. Bainhira iha formasaun no enkontru neebé halao iha lider konunitariu sira tenke tuir para bele iha konhesimentu hodi dehan prontu kandidata aan iha eleisaun.
Tanbà atu hasae barreia feto nian, fila fali bá ema idak-idak. Partidu politiku sira tenke tau asuntu feto nian iha partidu laran, labele loke partidu hanesan kios. Tenke prepara inan feton sira iha eleisaun tuir mai.
(dom)
