DILI, STLTIMORLESTE.com – Ministru Justisa, Sergio Hornai hatete, okupante sira neebe halo uma iha area Aeroportu nian, iha ekipa ida mak halo hela levantamentu kona-ba ai horis, uma no mos rai neebe iha, hafoin nee aprezenta ba Ministeriu Justisa hodi hatoo ba iha ministeriu relevante sira.
Nia dehan, ekipa konjuntu entre Ministerial hanesan ekipa husi Ministeriu Justisa (MJ) Ministeriu Obras Publiku (MOP), Ministeriu Agrikultura no mos obra nain ba iha projetu rasik, konserteza no Ministeriu Transporte Komunikasaun ka ANATL neebe maka sai hanesan nain ba projetu.
“Kuandu rai sira nee afetadu ba dezenvolvimentu ruma ka ba iha atividade sira kona-ba infraestrutura, konserteza ekipa nee tun atu halo levantamentu ba ai hori uma no sira neebe pertense ba Estadu ka partikular sei halo levantamentu aprezenta relatoriu,” dehan MJ, Sergio ba jornalista sira, iha Kaikoli, Dili, Kinta (23/10/2025).
Governante nee hatutan, se ida nee too ona iha relatoriu ikus ekipa halo konkluzaun katak, ida neebe simu ona no ida neebe seidauk simu, tanba uma kain por volta 50 ital maka iha neeba afetadu se balu simu ona no balu seidauk simu.
Maibe, Governu nia responsabilidade atu konklui tiha kompesasaun sira tuir faktus no tuir provas iha duni razaun, atu halo atribuisaun indimizasaun ka kompesasaun nee.
Kada relatoriu halo desokupasaun ba okupante sira tanba afetadu, iha levantanentu ida sempre mai husi ai horis ida ho nuu ida bele kualifika ho kualidade hira sira sei aprezenta, atu MJ halo fali rekomendasaun ba iha Ministeriu relevante atu bele halo prosesu ba iha pagamentu kustu ba iha objetu neebe afetadu.
Iha fatin ketak, Akademiku UNTL, Zacarias Soares dehan, Ministeriu sira tenke koopera ho komunidade sira, atu sira sai husi fatin nee ho diak.
“Ita haree kestaun sira hanesan nee tenke iha kooperasaun diak entre komunidade ho parte relevante sira, atu nunee sira bele sai maibe importante maka tenke indimiza sira,” dehan nia.
Jornalista: Terezinha De Deus
Editora: Carme Ximenes
