DILI, STLTIMORLESTE.com – Ekipa Jestor Programa partisipa iha formasaun, kona-ba lalaok atu implementa programa merenda eskolar.
Lia hirak nee hatoo husi Diretor EBC Manleuana, Carlos Correia ba STL iha nia knaar fatin Manleuana, Segunda nee (10/02/2025).
“Ita nian Ekipa Jestor Programa sira nee loron ida sira tein dala tolu, tanba nee tres turnu, dader sétimo ano ho oitavo ano han tiha sai meudia, terceiro ano sira tama han fali sira sai loraik, quadro ano, quinto no sestu ano tama fali sira han tuku 3, ami nian Ekipa Jestor Programa neebe mak tein iha nee hamutuk 12, ita nian Ekipa Jestor Programa sira nee mos tuir formasaun kona-ba lalaok implmentasaun programa merenda eskolar nian nee sira tenke hatene,” nia afirma.
Nia dehan, Ekipa Jestor Programa iha eskola seluk nee dala ruma troka, maibe iha EBC Manleuana nee la troka ida, sira nafatin deit, iha tinan kotuk Ekipa Jestor Programa ho adjuntu no Diretor Eskola husi EBC Manleuana tuir ona formasaun kona-ba oinsa atu implementasaun merenda eskolar.
“Ita nian Ekipa Jestor Programa sira nee tenke partisipa iha formasaun, tanba sira mak tein ba ita nian estudantes sira, maibe husi parte eskola nian sempre halo kontrolu, liu-liu ba menu ba programa neebe mak lao tuir duni orariu neebe mak iha,” nia esplika.
Iha fatin seluk, Fernando Soares hanesan Diretor Nasional Edukasaun Inkluzivu Asaun Sosial Eskolar hatete, iha tinan kotuk, husi diresaun ida nee fo formasaun ba kargu xefia foun inklui Ekipa Jestor Programa sira, liu-liu liga ba iha implementasaun programa merenda eskolar.
(jac)
